Juventus leh Roma an inhnehtawk

Italian Serie A-a sang pahnih inkhelah Juventus leh pahnihna Roma te chu 1-1 in an inhnehtawk.

Thawhṭanni zana Stadio Olimpico-a inkhelah mikhual Juve-in Carlos Tevez hmangin minute 64-naah hma an hruai a, Roma-in Seydou Keita-in minute 78-naah an sut.

Roma player Vasilis Torosidis chuan yellow card vawi hnih a hmuh avangin hnawhchhuah a ni.

Khelmualah chuan

Roma captain Francesco Totti-a hoa bul ṭan Roma-in ball an chang tam a, mah se inkhel erawh an thunun thei mai bik lo.

A hlauhawm hmasa zawk chu Juve lam an ni. Manchester United player hlui Patrice Evra chuan Chile international Arturo Vidal tan ball ṭha tak a pe a, Vidal hian goal khung tumin a pet nghal a, mah se Roma goal dinglam sirah a kal hlauh.

First half hmain Alvaro Morata leh Tevez te'n goal khungna hun ṭha an hmu leh a, mahse an hun ṭha neih an chhawr ṭangkai thei bik lo. Goal lut loin chawlhlawk an hmang.

Second half-ah goal hnih a lut a, goal hmasa zawk hi Juventus lam thun a ni. Minute 63-naah Torosidis chuan freekick a chawi a, hnawhchhuah a ni zui bawk. Freekick aṭang hian Tevez-a'n hmahruaina goal a khung.

Roma lamin point hloh an tum bik lo, an si phurh sut tumin an nawr let nghal. Minute 77-naah Alessandro Florenzi ball cross ṭha zet mai chu Keita chuan Juve goalkeeper Gianluigi Buffon dan hman lohin a tauh lut. Inkhel tawp thlengin goal dang a lut tawh lo, team pahnihin ten point khat ve ve an insem.

Inkhel chhehvel

Roma champion hnuhnun ber ṭum chu 2001 daih tawh kha a ni a, tun season-ah hmahruaitu Juve hi point khuain an la pha lo. Match 13 khelh tur la awm a, lehthal a awlsam tawh lo ang.

Thawhṭanni zan inkhelah hian yellow card vawi 11 zet phawrh a ni a, anni pahnih inkhelah hian card an phawr hnem ṭhin hle. Kum 1994-95 season aṭang a tun thlengin an inkhel bikah red card 26 phawrh a ni tawh a, team pahnih te hian vawi 13 ve ve hnawhchhuah an tawk tawh a ni.

Juve hian season hmasa khan Serie A-ah point 102 hmua record siam chungin an champion a, kuminah hian match 25 khelh tawhah point 58 hmu leh tawhin a zawna vawi li nan nomawi chawi leh an tum hle.

Eng nge an sawi?

Roma manager Rudi Garcia chuan, "Ka sawi duh ber chu kan theihna zawng zawngin kan bei tih hi a ni. Team ṭha tak kan hmachhawn a, chutah kan player hnawhchhuah tawk kan awm bawk, chuti chung a point kan hlawhchhuak thei hi ka lawm," tiin a sawi.

Juventus manager Massimiliano Allegri chuan, "Draw hi result ṭhaah ka ngai hran lo, a chhan chu team ṭha zawk kan ni a chak zawk nih kan phu. Kan goal neihsa kan hum zo lo kha a pawi takzet, minute 70 thleng kha chuan kan khel ṭha viau a, mah se a tawp minute 20 kha kan khel ṭha tawk lo a ni," tiin point khatah a lungawi lo.