Zarkawt Lords an chak chiang

Mapuia Cricket League vawi thumna match hmasa berah Zarkawt Lords Cricket Club-in runs 58 zetin Zemabawk Pitchers Cricket Club an sawp.

Lords batsman Zahir Uddin chuan run 68 siam­in, tun inelnaa half century siam hmasa ber a ni.

Nimina Suaka Cricket Ground, Sihhmuia inkhelah Zemabawk coin toss-ah an vannei a, vawm hmasak an thlang.

Lords tan opener Parvez Ahmed a che ṭha tawk lo a, ball 12-ah run li chiah siam mah se a dinpui Michale Lalchhuanawma'n ball 25-ah run 24 a siam a. Michael hi Zahir Uddin-a'n a rawn thlawp ṭha a; Uddin hian ball 44-ah run 68 zet a vaw chhuak a, a dam tluan bawk. Zarkawt hian overs 20-ah runs 136 an siam a, wicket 5 an hloh.

Zemabawk hun a thleng a, a tir aṭangin an talbuai nghal a. Vishnu Bhondari-a'n run 28 a vaw chhuak a, a teammate zingah run 15 vaw pel an awm lo. Lords-in over 16-ah Pitchers-te hi an vawm hlum fai vek a, run 78 chiah an vaw chhuak.

Lords bowler Parvesh a khel ṭha a, run kua lek pein wicket thum lai a la bawk.

Vawiin hian Suaka Cricket Ground-ah inkhel chhunzawm tur a ni a. Dar 9:30-ah Chanmarians Cricket Club leh Ramhlun Venglai an inkhel ang a, chhun dar 12:30-ah Armed Veng Cricket Club leh Chaltlang Sporting Club te an inkhel bawk ang.