Mizoramin Delhi an hneh

2015 Santosh Trophy-ah champion lai Mizoram-in an game hmasa berah nimin khan Delhi 2-0 in an hneh a, goal khungtute hi Mizoram Police player Lalbiakhlua leh F. Lalrinpuia te an ni.

Thlirna Tawi

Mizoram hi Group B-ah Delhi, Railways, Goa leh Kerala nen an awm ho. Delhi leh Railways-te hi match hmasa berah goal awm loin an inhnehtawk a, Kerala hian Thawhṭanni khan Goa 1-0 in an hneh. Mizoram hi Group B hmahruaitu an ni.

Group A match hmasa berah Punjab-in Assam 2-0 in an hneh a, Services-in Mizo tlangval Francis Zonuntluanga goal hmangin Maharashtra 1-0 in an hneh. Nimin khan West Bengal-in Raja Das goal hmangin Assam 1-0 in an hneh bawk.

Inkhelh hma chanchin

Champion lai Mizoram hian Santosh Trophy-ah Delhi an hneh ngai lo. Tun ṭuma Delhi team hi an chhe lo, I League 2nd Division-a Hindustan player eng emaw zat an awm avangin Railways nena an inhnehtawk kha thil mak a ni lo.

Punjab-ah tun hnaiah ruah a sur nasat avangin Jalandhar-a stadium lian ber Guru Gobind Singh Stadium chu a diak hle a, Mizoram leh Delhi-te hi JCT Sports Complex, Chohal-ah khelh tir an ni. Jalandhar aṭanga Chohal hi km 50 zeta hla a ni chungin Mizoram team ṭan turin Mizo zirlai ṭhahnem tak Jalandhar, Chandighar leh a chhehvel aṭangin an kal.

Goal hnihna a tawk

First half-ah Mizoram chungnung zawk mah se game nung tak an khel lo. Mizoram tan Zico, Valpuia, Biaktea leh MK-a te'n goal khung theihna chance ṭha an hlah a, clear chance erawh a awm meuh lo. Delhi lam pawhin chance an nei bik lo.

Second half-ah Mizoram tan Biaktea'n chance ṭha a hlah hnuah Johny corner pet chu buai nuaih nuaih karah a khung a, minute 51-ah 1-0 a ni.

Mizoram-in inkhel an thunun chhunzawm a, goal chance an nghah a, goal hnihna erawh hmuh tur a awm lawk lo. Minute 86-naah Valpuia'n goal ropui a khung, Police forward hian Delhi player pathum a bum hnuah lei hrulin a pet a, goal ban perin a lut. Mizoram 2-0 in an chak.

Hmasawn duh Mizoram

Mizoram manager Vanlalngheta chuan, "Ruahsur vangin practice hun vawi khat chiah kan nei a, February 25-a Aizawl chhuahsan tawh kan ni si a, kan tuar deuh a ni. Kan chak avangin kan lawm a, kan khelh dan erawh kan training lai kan la phak lo hle. Min ṭan tura lo kal Mizote chungah kan lawm takzet," a ti.

Coach H. Vanlalthlanga chuan, "Practice-na hun vawi khat chauh kan neih avangin bul kan ṭan ṭha tawk lo a, second half-ah erawh kan khel ṭha thawkhat e. Match hnih dangte kan khelh leh chuan game ṭha tak kan khel thei tawh ang," tiin a sawi.

Mizoram boss chuan, "Ground ṭha takah khel mah ila a huh deuh avangin khelh a harsa hle. Amaherawhchu helai hmuna Mizo mipuite hnen aṭangin ṭawiawmna kan hmu ṭha a, anni zarah ṭha takin kan khel thei a ni," a ti.

Vawiin hian Group A-ah Services leh Punjab an inkhel ang a, Group B-ah Railways leh Goa an inkhel ang. Mizoram hian naktuk hian an match hnihnaah point thum hmu tawh ve tho Kerala an hmachhawn dawn a, inkhel pawimawh tak a ni ang.

Tute nge khel?
Goalkeeper : Lalawmpuia. Defenders : Lalrinzuala Khiangte, Ronald Zothanzama, Lalrinchhana Tochhawng, Lalruatthara. Midfielders : Lalbiakhlua (Laldingngheta), Samson Ramengmawia (Captain), Johny Lalfakzuala (Lalṭanpuia), H.Lalmuankima. Forwards : Zico Zoremsanga (Lalrinfela), F.Lalrinpuia.