South Africa-in Ireland an sawp

ICC World Cup 2015-ah South Africa an che ropui chhunzawm zel a, nimin khan Ireland chu run 201 in an sawp.

Manuka Oval, Can­berra-a inkhelah hian South Africa tan Hashim Amla a khel ṭha a, ball 128 a hmachhawnah run 159 vawchhuakin a team a chakpui a ni.

Toss-ah South Africa an vannei zawk a, bat hmasak an thlang. South Africa in over 50-ah run 411 vawchhuakin wicket pali chiah an hloh a, heti zat run um hi Ireland tan chuan huphurhawm tak a ni. Ireland bat ve hmain chak tur a chiang ti tih der tawh. South Africa tan run 159 siamtu Hashim Amla bakah Faf du Plessis-a che ṭha a, ball 109 a hmachhawnah run 109 a vawchhuak.

Bowling lamah South Africa tan fast bowler Kyle Abbott-a che ṭha a, run 21 chiah pein wicket li lai a la bawk.

Ireland-in an theih­tawp chhuahin target 412 um mah se tlin ngang lo a, over 45-ah run 210 vawchhuakin an out vek a ni. Ireland tana run siam hnem ber Andy Bal­birnie chuan ball 71-a hmachhawnah run 58 chiah a vawchhuak thei a ni.

Inkhel behbawm

South Africa hi ODI match hnih chhung a zawna run 400 siam tling thei hmasa ber an ni a, run 200 aia tam a zawna vawi hnih chak thei pahnihna an ni. South Africa tana run 100 vaw tling thei pakhat zawk Amla tan a century hi team 11 laka century a siamna a ni a, amah ang bawka team 11 laka century siam thei chu Australian cricketer ropui Ricky Ponting leh India batsman ropui Sachin Tendulkar te an ni.