Clay court lalpa Rafael Nadal

Rafael Nadal chuan Juan Monaco 6-4 6-1 a hnehin Argentina Open-ah a champion. Spanish tennis player hi clay court-a vawi 46-a champion-na chiah a ni.

Guillermo Vilas-a'n Clay Court champion record lo siam tawh chu a nih rual ta chiah bawk a. Nadal hian tennis a khelh chhungin champion nomawi 65 zet a chawi tawh.

Buenos Aires-ah hian inkhel an ṭan chauh tihin ruah sur vangin inkhel chawlh lailawk a ni. An chawlh hma hian game khat ve ve bak an la hman lo. Inkhel an chhunzawm leh hnuah Nadal hian harsat na a tawk lo a, awlsam takin Argentina Open nomawi a chawi thei a ni. Chak tur hian Nadal hian darkat khat leh minute 26 chiah a hmang.

Nikum Roland Garros-a final a khelh hnu a final-a thlen lehna hmasa berah a champion leh a ni. Inhliam vangin Nadal hi a buai ve deuh reng a, a inkhleh tam theih loh avangin World ranking-ah pawh Britain Andy Murray-a hnuaiah awmin pathumna a ni mek.

Kum 28-a upa Spanish Nadal chuan, "Ka inbuat­saihna a ṭha a, hliam leh natnain min tih buai loh avangin ṭha takin ka khel thei a, ka champion hi ka lawm hle a ni," tiin a sawi.