Zaninah champion tum pahnih an inlan dawn

Premier League chanchin a ngaihnawm zel a, champion tum Chelsea leh Manchester City te zaninah an inkhel ve ve dawn. Chelsea-in West Ham nen London derby an khel ang a, City-in Leicester an mikhual thung ang.

League Cup champion Chelsea

Chelsea-in zanin dar 1:15-ah West Ham an tum dawn. Chelsea hi League Cup-a champion hlim hlawl an ni a, nomawi an chawi laia an elpui Manchester City-in Liverpool an hneh loh avangin vawi khata khel tlem zawk chungin point nga laiin hma an hruai fal tawh a ni.

Mourinho enkawl Chelsea hi tunhnai Premier League match vawi ruk an khelhah chak loh an la nei lo a, an khelh hnuhnun ber ṭumin Burnley nen 1-1 in an inhnehtawk.

Chelsea-in Premier League-a an hneh loh hnuhnun ber chu Capital One Cup final-a an hneh tak Tottenham Hotspurs an ni a, January 1 khan Spurs hmaah 3-5 in White Hart Lane-ah an mualpho. Amaherawhchu Boleyn Ground-ah Chelsea hian point an hloh a rinawm loh.

West Ham erawh tunhnai Premier League match ruk an khelhah vawi khat chiah hnehna an chang thei. Premier League match an khelh hnuhnun ber February 28 khan an khelmualah Crystal Palace an hneh lo a, 1-3 laiin an tlawm. Chelsea meuh lo hneh tur chuan Sam Allardyce-a nau te hian an lo beih ve fe a ngai ang.

Jose Mourinho hnuaiah West Ham leh Chelsea hi vawi sarih intum tawhin, Chelsea-in vawi ruk hnehna an chang a, vawi khat an in inhnehtawk bawk. West Ham hian Chelsea nen an intum hnuhnung vawi rukah vawi khat chiah Chelsea goal-ah an la pet lut ve a ni.

Eng nge an sawi?

Chelsea manager Jose Mourinho chuan, "Kan vai a kutah kan chak leh chak loh chu a awm a ni. Match harsa tak tak khelh tur kan la nei nual a, City pawhin chutiang bawkin game hautak hmachhawn tur an la nei ṭeuh a ni. Manchester United pawhin champion theihna chance an nei a ni. City leh Liverpool an inkhelh khan ka player-te result-a innghat lo turin ka hrilh a, tupawh chak se buai lo turin ka hrilh a ni," tiin team dang result-ah an innghah loh thu a sawi.

West Ham keeper Adrian chuan, "Mourinho hian min la hria nge hre lo ka hre lo. Mahse, a team enkawl ka tum apiangin result ṭha tak ka hlawhchhuak ṭhin a, Mourinho team tum hi nuam ka ti a ni, " a ti.

Adrian hian kum 2012-a Real Betis tan a khelh laiin Mourinho enkawl Real Madrid lakah goal a lo chhuah lo tawh a, 1-0 in a team hnehna a chan pui. Nikum khan Stamford Bridge-ah goal chhuah loin minute 90 chhung a hmang tluan bawk.

Leicester mikhual tur City

Pathianniah Machester City-in khualmualah Liverpool an hneh zo lo a, champion turin inum boruak san vanglai takin point thum an hloh. Zanin dar 1:15-ah Etihad Stadium-ah Leicester City an lo mikhual dawn.

City hian Barcelona an hneh loh hnu lawkah Liverpool an hneh lo leh a, an 'puja' fuh loh lai tak a ni.

Team pahnih inkhel tur hi an dinhmun a inang lo khawp a, City hian champion tum ngeia an khelh laiin an mikhual tur Leicester erawh tlak loh hram tuma inkhel tur an ni. Leicester hi table mawngah awmin point 18 an hmu mek.

Manchester City hian tunhnai Premier League match ruk an khelhah vawi hnih chiah hnehna an la chang. Leicester City hian Premier League an khelh hnuhnung match rukah vawi khat chiah hnehna an chang ve bawk.

Citizens (City sawina) tan Lei­cester City hi zuam ngawt chi an ni bik hauh lo. City khelmuala vawi thum an intum tawhah Leicester-in hnehna an la chang vek a, goal an chhuah miah lo bawk.

Manchetser City hian Premier League match hnuhnung vawi 18-ah vawi ruk chiah goal chhuah loh an nei a, an tumpui te goal-ah vawi 447 an pet tawh a, goal shot ngah ber an ni.

Eng nge an sawi?

Manchester City manager Manuel Pellegrini chuan, "Liverpool kan hneh loh khan kan nau teah nghawng a neih leh neih loh chu inkhelh hunah kan hria ang. Ka naute'n a hma anga ṭha taka an khelh leh theih vat a, zaninah hnehna kan chan ngei ka beisei a ni. Point kan hloh apiangin kan tan chuan champion a harsa sawt zel a ni. Team dang khelh danin min tibuai lo. Kan khelh dan hi a pawimawh ber chu a ni a, pangngai taka khelchhuak leh thei tura kan inbuatsaih a ngai a ni," a ti.

Leicester City manager Nigel Pearson chuan, "November aṭang tawh khan table mawng berah kan awm reng a, mah se tunhnaia kan khelh dan enin hma kan sawn em em a, kan player te'n theihtawp an chhuah a ni," a ti.

Leicester hian an match hnu­hnung berah Everton nen 2-2 in an inhnehtawk.