Zaninah Khatla leh Zarkawt inelna

Mizoram Super League-ah Khatla TBL-in ngam loh an la tawng lo a, Zarkawt Serpents-in ngam an la nei lo. Match thumnaah Zarkawt-in result ṭha neih an duh chuan an veng mipui ṭawiawmna ṭhahnem tak an an mamawh dawn a, Khatla erawh tam tura ngaih an ni tawp.

Zanin dar 8:00 hian Hawla Indoor Stadium-ah Zarkawt Serpents te'n Khatla TBL thlipui dal an tum dawn a, inkhel entlak tak a beisei theih ang.

Khatla TBL-in Mission Vikings an sawp ṭuma khel ṭha Vanlalmuana (21 pts) leh Gospel Lalthuammawia (10 pts) te damloh vang leh inhliam vangin Serpents hmachhawn turin an dinhmun a chiang lo. Amaherawhchu player dang an dam - H. Laldinsanga, Lalrinzuala, Nelson Lalrohlua, Vanlalnunsanga leh Darliansanga te hi team chak pui turin an ṭha tawk.

Zarkawt Serpents hi ṭum hnih ngawt chak tawh lo mah se an chak loh dan thlirin vanneihna an neih tam tawk loh vang chauhin chak result an la nei loah a ngaih theih.

Zarkawt derby-ah Champhai phir unau Hmingthanmawia (3 Pts) leh Lalremruata (6 Pts) te an che ṭha tawk lo a, amaherawhchu Lalrinzuala (17 pts), K. Lalhruaitluanga (17 pts) leh Lalsangkima (13 pts) te an che ṭha a. TBL hmaah heng player pangate hi an che ṭhat rual theih chuan hnehna an chang thei ang.

Eng nge an sawi?

Zarkawt Serpents coach Dino Laldinpuia Chhangte chuan, "Table aṭangin kan thlir lo. TBL hi keini aiin point hmu sang mah se kan hneh thei tih kan hria. Kan hlauh thawn ber chu rhythm a luh a ni a, player ṭha awmna an nih avangin inkhel an thunun tawh chuan talchhuah leh a har tawh ṭhin. Player mala ven erawh kan tum lo," tiin an khelh dan tur a sawi.

Dino chuan sawi chhunzawmin, "Kan beisei aia tam vengchhung mipui ṭawiawmna kan hmu a, Khatla nena inkhelh hunah pawh hian ṭha taka min ṭawiawm ka beisei," tiin a sawi.

Khatla TBL captain Vanlalnunsanga (Lana) chuan, "Serpents hi MSL awm hma khan league-ah ṭum hnih kan hneh tawh a, kan chak chiang tihna erawh a ni lo. Kan khingpui reng reng hi hnehsa khelhin kan khel ngai lo. Kan game plan anga khelh chhuah hi kan tum a ni a, chumi tur chuan ṭan viau a ngai ang," tiin a sawi.

Khatla tlangval Lana chuan sawi chhun­zawmin, "Vengchhung leh veng pawnin min ṭawiawm ṭha a, Zarkawt Serpents kan khelh hunah pawh hian theihtawp chhuaha min ṭawiawm leh turin kan sawm tak meuh meuh a ni," a ti.