Pakistan-in UAE an hneh

Nimina ICC World Cup 2015 Group B in­khelah Pakistan-in UAE run 129-in an hneh.

Pakistan hian vawi li an khelh tawhah vawi hnih an chak a,UAE tan erawh vawi li khelhah an tlawm vek.

McLean Park, Napier-a inkhelah hian Pakistan tan Ahmed Shehzad chuan run 93-a vawchhuak a, UAE tan Shaiman Anwar chuan half-century a hlap chhuak bawk.

Ṭhum vawrah UAE an vannei zawk a, fielding hmasak an thlang.

Pakistan tan Ahmed Shehzad chuan ball 148 a hmachhawnah run 93 a vawchhuak. Captain Misbah-ul-Haq chuan ball 65 a hmachhawnah run 65 a vawchhuak a, dinhmun duhawm takah Pakistan an inhlangkai.

Pakistan-in run an siam zawng zawng zat hi 339 niin over 50 chhungin mi paruk chiah an hloh hman. UAE tan Manjula Guruge-a'n a vawm ṭha a, run 56 chiah pein wicket li a la a, mah se bowler dang te'n an vawm ṭhat ve loh avangin a thawhrimnain a team-te a chakpui zo lo.

UAE-in an target 340 an um a, World Cup-a khel ṭha em em mai Shaiman Anwar chuan ball 88 a hmachhawnah run 62 a vawchhuak a, over 50-ah mi pariat hlohin UAE hian run 210 an siam a, an chak zo ta lo a ni.

UAE tan Shaiman Anwar hi kumin World Cup-ah a che ṭha hle. A run siam zawng zawng zat hi 270 a ni a, kumin World Cup-a run siam hnem ber dinhmun a hauh mek a ni.