Sherwood-a enkawl Villa chak ve ta

Thawhlehni zan Premier League inkhelah Aston Villa chuan Villa Park-ah West Brom chu 2-1 in an hneh a, relegation zone aṭangin an tal chuak.

Spurs boss hlui Tim Sher­wood-a enkawlna hnuaiah Villa hian match thum an khel tawh a, tum ṭum hi an chakna hmasa ber a ni. Villa tan Gabriel Agbonlahor-a'n minute 22-naah goal hmahruai a khung a, first half-ah goal dang a luh belh lo.

Second half-ah West Brom forward Saido Berahino-a'n minute 66-naah an siphurh a sut a, 1-1 a ni. A tawpah Villa an vannei a, Belgian forward Christian Benteke chuan penalty aṭangin Villa chakna goal a khung.

Goal hmahruai khungtu kum 28-a upa English Agbonlahor hian tun season-ah goal li chauh a la khung a, a match hnuhnung 14-ah goal a khung tawh lo.

West Brom goal awmchhun khungtu rawlthar kum 21 chauha upa Berahino hi tun season-ah a club tan inelna hrang hrangah goal 18 a khung tawh.

Chakna goal khungtu Belgian striker Benteke hian goal thun loin match kaw chhung a khel tawh a, mah se Thawhlehni zana an manager thar hnuaia a an chakna hmasa berah a recrod duhawm loh tak a titawp.

Aston Villa coach Tim Sherwood chuan, "Kan duh point thum kan hmu ta. Hmalam hun chu a eng zawngin kan thlir thei tawh ang. Kum tharah Premier League khelh chhun zawm ngei kan tum ruh hle a ni," tiin a sawi.

Point thum hmu Villa hian match 28 khelh tawh aṭangin point 25 an hmu ta chiah a, table-ah 18-naah awmin tla thei dinhmunah an ding.