German Cup quarter final-ah Dortmund

Thawhlehni zan khan German club ṭha Borussia Dortmund chuan Ciro Immobile goal hnih hmangin Dynamo Dresden chu 2-0 in an hneh a, DFB Pokal Round of 16-an paltlang a, quarter final an inhlangkai.

Glucksgas Stadium-a inkhelah Italian forward Immobile chuan minute 50-naah leh injury time-ah goal a khung. Italian forward hian 2014 khan Italian club Torino aṭangin pound maktaduai 15-in Dortmund-hi a zawm a, a club thar tan hian match 27 khel tawhin goal kua a khung tawh.

Season bul ṭan fuh lo Dortmund tunlai hian an insiam ṭha mek zel a, Bundesliga-ah match hnuhnung paliah hnehna an chang a, German Cup-ah hnehna an chang bawk.

Poland captain Jakub Blaszczy­kowski a khel ṭha a, Immobile-a goal khung tur hnuhnung zawk a siam sak. Dortmund star tun hnaia contract thar ziak hlim Marco Reus erawh inhliam vangin ṭan aṭanga minute 22-na lekah lakchhuah a ni.

Kum 25-a upa German mid­fielder Reus hian kheimit hliam avangin 2014 World Cup a khel thei lo tawh a, nikum September leh November thla khan khup vei lam hliam vangin chhawr theih a ni a lo. A dam aṭanga thla li hnuah khup veilam vang bawkin a buai a, Dortmund tan chuan thu lawmawm a ni lo. Reus hi tun hnaia Dortmund chetṭhatna chhan a ni.

Dortmund coach Jurgen Klopp chuan, "Reus ke ruh kha a tliak emaw ka ti hman a, amaherawhchu chutiang em em chu a thleng lo. Enfiah hnuah a nat dan kimchang chu a hriat ang," tiin a sawi.

DFB Pokal inkhel dangah Bayer Leverkusen-in extra time-ah Kaiserslautern 2-0 in an hneh a, Mizoram-a rawn zin Hoffenheim-in hetiang zat bawk hian Aalen an hneh bawk.

FC Cologne-in khualmualah SC Freiburg 2-1 in an hneh lo.