Mizoram hmachhawn tur Kerala

Sulhnu aṭanga en letin Santosh Trophy-ah Kerala aia record nei ṭha West Bengal leh Punjab chiah an awm. Kerala hi vawiina Mizoram khingpui tur an ni a, senior level-ah team pahnih hi tun hnaiah an inhmachhawn lo.

Inkhelh hun hi tlai dar 3:00 a ni a, Punjab-ah khua a ṭhat tawh avangin inkhelhna hmun tur hi Guru Gobind Singh Stadium, Jalandhar a ni.

Hei le Sawmfela

Mizoram starting eleven-ah MPL3-a striker hmuhnawm ber ang hiala chhal ngam Malsawmfela a tel dawn. Ram­hlun South tlangval talent nei ṭha tak hi fitness ṭhat tawk loh vangin minute 90 chhung a khel ngai meuh lo.

MPL3-a goal kaw khungtu Sawmfela hian Mizoram champion ṭuma captain Zico Zoremsanga aiah a lut dawn a, Republic Veng forward F. Lalrinpuia nen an inkawp dawn.

Midfield-ah Ramthar tlang­val Johny Lalfakzuala aiah Police midfielder thawkrim V. Lalṭanpuia a inlan hmel a, Tlungvel midfielder hi captain Samson Ramengmawia nen midfield laiah an che tla dun ang.

Republic Vengthlang winger Lalruatfela fiahin a awm dawn a, tawnhriat nei ṭha Keifang tlangval Lalbiakhlua aiah a lut dawn. Tlar hnung lamah danglamna a awm a rinawm loh.

Mizoram-in Delhi an hneh ṭuma field chhunga inlante chu a hnuaia tarlante hi an ni.

Goalkeeper : Lalawmpuia. Defenders : Lalrinzuala Khiangte, Ronald Zothanzama, Lalrinchhana Tochhawng, Lal­ruatthara. Midfielders : Lalbiakhlua (Lalruatfela), Samson Ramengmawia (Captain), Johny Lalfakzuala (V. Lalṭanpuia), H.Lalmuankima. Forwards : Zico Zoremsanga (Malsawmfela), F.Lalrinpuia

Mizo an ṭang

Mizoram hi Jalandhar leh Chan­digarh Mizo te'n an ṭawi­awm ṭha hle. Delhi nena Mizoram inkhelh ṭum khan Mizo 100 bawr vel awmna Jalandhar aṭangin 40 velin inkhel en turin an chhuak a, Mizo 80 bawr vel awmna Chandigarh aṭangin 20 velin inkhel an en bawk.

Chandigarh Mizo Union president Benjamin Lalsangliana chuan, "Mizoram match hmasa ber kha khaw pawn daih a nih avangin kan kal tam thei lo a, 18 vel chauhin kan ṭawiawm thei. Kan ram tan theihtawp kan chhuah a, banner-te kan siam a, RIN RIN aṭangin Mizoram jersey chah an awm bawk. Kerala nena an khelh hunah hian an tam tawk thei lo maithei, amaherawhchu Inrinnia Railways kan hmachhawn hunah chuan kan ṭhahnem khawp ang," a ti.

Coach thukhawchang

Mizoram manager H. Van­lalthlanga chuan, "Kerala khel en ala remchang lo a, an ṭhat dan hriatthiam a har a ni. Kerala hian Goa an hneh a, an ṭha ang tih chu a chiang. Keini chuan kan theihtawp kan chhuah ang, chu chu kan tih theih tawk a ni," a ti.

Chanmari FC boss Thlanga chuan sawi chhunzawmin, "Punjab-ah training mumal kan neih theih loh avangin kan game hmasa berah kha chuan kan hlauthawng a, tunah chuan game ṭha zawk kan khelh theih tawh ka ring. Helai hmuna Mizo awmte ṭawiawmna kan nei ṭha a, chu chuan chakna nasa tak min pe a ni. Kan inkhelh leh turah hian Mizo mipuite ṭawiawmna kan ngen e," tiin a sawi.

Result dang

Nimin khan Group A hma­hruaitu inchuhna inkhelah Punjab leh Services te an inhneh­tawk a, point li ve ve hmuin goal difference nei ṭha zawk Punjab-in hma an hruai. Group B inkhelah Goa-in Railways 3-1 in an hneh.