Inkhelh zel ka duh - Terry

Chelsea captain John Terry chuan inkhelh chawlhsan lo a inkhelh chhunzawm zel a la duh thu a sawi.

Kum 34-a upa Terry-a contract hi tun season tawp rual hian a tawp dawn a, a khelh mekna Chelsea nen contract thar an ziak lo a nih chuan inkhelh chawlhsan thut thei dinhmunah a ding.

Pathhianni zana Chelsea leh Tottenham ten Capital One Cup final an khelh ṭum khan Terry hian goal hmahruai a khung a, man of the match a thlan a ni. Ṭha taka ala inkhelh theih avang hian Terry chuan kum tharah pawh Chelsea tana inkhelh theih ala beisei a ni.

Chelsea hian an player kum 30 chunglam chin chu kum khat daih bak contract an ziah pui ngai lo a, nikum khan Terry pawh hian kum khat daih contract a lo ziak.

England captain hlui Terry chuan, "Tunah hian ka hun hnuhnung ka hmang ve mek a, chawlh ka hlat tawh lo. Mahse tuna ka dinhmun ka thlir hian kum khat dang chun ṭha takin ka la inkhelh theih ka ring a, a bak leh zel chu ka sawi lawk theih a ni lo. Chelsea-ni lo club danga khel tur hian ka rilru ka la siam chhin ngai lo a, kan hotu ten rem an tih chuan season tharah Stamford Bridge-a cham ka duh," tiin inkhelh chhun zawm ala duh thu a sawi.

Chelsea captain chuan sawi chhunzawmin, "Kan manager Jose Mourinho nen pawh kan sawi dun tawh a, ka kum tam deuh tawh mah se ka theih tawp a ka beih chuan ka tan hmun ala awm thu min hrilh a ni. Chuvang chuan Blues tan hian ka theih tawp ka chhuah chhunzawm zel ang," tiin a sawi.