Saints-in chak hmel an hmu ve ta
Southampton-in West Ham United an draw hnuah Liverpool leh West Brom an hneh lo. Thawhlehni zan khan St Mary's Stadium-ah Crystal Palace an mikhual a, minute 83-naa Sadio Mane goal hmangin 1-0 in an chak hram.
Southampton-in season thara Champions League khelh an beiseina an chhawm nung zel a, table-ah panganaah inhlang chhoin nizana inkhel Liverpool result a zirin an dinhmun hi danglam thei a ni.
Inkhelh hma chanchin
Southampton-in beisei phak baka ṭhain season bul an ṭan a, Champions League khelh hial an sawi hman. Amaherawhchu tun hnaiah Southampton an che chhia a, League game vawi thumah hnehna an chang zo tawh lo.
Crystal Palace hi season chawhma lamah relegate thei dinhmunah an ding hman a, January thlaa Newcastle United manager Alan Pardew an lakluh hnuah hartharna an chang. Saints nena an inkhelh hnuhnun ber ṭum chu FA Cup fifth round a ni a, Palace 3-2 in an chak.
Inkhel chu
Palace-in an regular player pathum an chhawr thei lo a, inhliam vangin Jordon Mutch bakah hrem vangin Glenn Murray leh Mile Jedinak-te an inlan thei lo. Southampton-ah Filip Djuricic-a'n bul a rawn ṭan tih lohah chuan player inthlak danglam a awm hran lo.
Southampton aiin Crystal Palace-in bul an ṭan ṭha zawk a, Yannick Bolasie ball cross chu Wilfried Zaha-a'n a lo khung hmain Fraser Forster chuan a lo man hman hlauh. Chawlhlawk hma lawkin Saints-in hun ṭha an nei a, tunhnaia Premier League match 10 chhung goal khung tawh lo Graziano Pelle chuan hnai te aṭangin goal zawnah a pet thei lo.
Second half an khel a, chance nei hmasa zawk chu Crystal Palace bawk an ni. Mahse, Southampton player hlui Jason Puncheon pet chu Forster chuan a kein ṭha takin a dang. Palace tan Bolasie-a'n chance neih chhunzawm mah se Palace-in goal an khung thei tlat lo. Manchester United aṭanga an lak kir Palace forward Wilfried Zaha chuan post a pet per dawp bawk.
Southampton-in ball an chang tam zawk a, Saints Japanese player Maya Yoshida chuan hnai tak aṭangin a pet goal lo. Saints-in an khelmualah Palace hneh loh nawn an tum lo a, James Ward-Prowse ball pet Palace keeper Julian Speroni-a dan per chu Mane-a'n goal-ah a khung, goal luh hun hi minute 83-na a ni a, goal dang a luh belh lo.
Eng nge an sawi?
Southampton manager Ronald Koeman chuan, "Point thum hlawhchhuah ngei ngei kha kan mamawh a ni. Chance ṭha tak in siam thei lo mah ila, a tawpah chak duhna thinlung khan hnehna min chanpui ta a ni. Ka player-te'n tunhnaiah inrintawkna an tlachham a, chak zel tur chuan inrintawkna kan neih a ngai a ni," a ti.
Crystal Palace manager Alan Pardew chuan, "Second half-ah khan kan khel ṭha zawk a, goal khung thei dinhmunah kan ding a ni. Penalty hlawhchhuahna hun ṭha kan neihah penalty pek kan ni lo. Southamptyom defender Jose Fonte kha inkhelh chhung zawng khan foul a ngah em em reng ringawt mai a ni," tiin referee leh an khingpuite khelh danah a lawm lo tih a sawi.