Arsenal an la induh khawp lo deuh

Nipui bazar a la tawp lo a, squad thuam chhah tumin club hrang hrang an la buai - Arsenal pawhin Real Sociedad aṭangin Spain midfielder Mikel Merino lakluh tumin a vawi hnih nan tha an thawh leh mek.

Kum 28 mi Merino hi season hmasa khan player hmuhnawm a ni a, club tana a chet ṭhat mai bakah an ram Spain tan pawh a che ṭha - Euro an champion theihna zinga mi niin match zawng zawng a khel vek, a thlengtu Germany an petchhuah dawn ṭuma chakna goal khungtu kha a ni.

Real Sociedad tan season khat daih chah contract a nei tawh a, pawhsei tumna a nei rih lo - contract a ziak thar a nih loh chuan nakkum January thla aṭangin man nei loin a duh zawng club a be thei dawn.

La Liga club hian a thlawna chhuahtir ngawt ai chuan man neia hralh an duh ngei ang tih a chiang a, an phalna zat anga dawrtu an awm erawh a ngai - North London club nen an indawr rih dawn niin a lang.

Gunners hian pound maktaduai 21.4 hum chungin Real Sociedad hi an dawr tawh a, mahse an lo hnawlsak. English chanchinbute tarlan dan chuan Spanish club hian pound maktaduai 30 tal an beisei a ni.

Central midfielder Merino hi 6ft 2in a sang a ni a, an la thei a nih chuan Arsenal hi set piece-ah an hlauhawm lehzual tura ngaih a ni a, an duhlai Declan Rice thlawptu bakah English midfielder elpui a ni thei ang.

Mikel Arteta-a'n Rice, Jorginho, Thomas Partey leh Martin Odegaard a nei a, chhawr theih nei nual mah se a la duhkhawp lo, hliam an awm theih bakah season tluanin match khelh tur an ngah ṭhin a, a mamawh belh a ni.

Tun nipui bazar chhungin Arsenal hian Italy defender Riccardo Calafiori an la lut tawh a, an academy chhuak Emile Smith Rowe chu Fulham lamah a kal tawh thung - sriker Eddie Nketiah chu dawrtu a zirin chhuak thei dinhmunah a ding mek bawk.

Arsenal hian Premier League champion an châk a, season hnih chhung chu an hnaih thei hle. Tun season bul ṭan nan zanin dar 7:30 hian Emerates Stadium-ah Wolves an lo mikhual dawn a, point thum nena bul ṭan nghal an tum ang.