Kan squad a chhah ṭha tawk - Slot

Liverpool chuan vawiin tlai dar 5:00 hian Premier League match khel turin Ipswich Town an lenchilh dawn a, an hmachhawn tur team hi top flight league inpetkai hlim ni mah se, coach Arne Slot chuan a awlsam loh tur thu a sawi.

Slot chuan, "Ipswich Town inkhel hi season hmasa leh pre-season kan thlir a, a awlsam dawn lo tih ka hria. Kai thar an nih avangin an phur hle ang tih ka ring.

"Mi tam takin Premier League-ah eng game mah a awlsam ngai lo tih min hrilh a, chu chu ka beisei dan pawh a ni. Ipswich nena inkhel turin kan inpeih e," tiin a sawi.

Liverpool hian tun nipui transfer-ah player an la la lut miah lo a, coach Slot erawhin an ṭhat tawk thu a sawi. Dutch coach chuan, "Player thar kan lakluh loh avangin kan chhe sawt ang maw? Hei hi chu ka pawm loh zawng tak a ni.

"Player-te chu a hma aia an ṭhat zawk theih nan training ground-ah kan pui thei a lawm. Player thar lakluh avanga team ṭha sawt tura ngaihna hi ka pawm loh zawng a ni," tiin a sawi a, an squad a chhah tawk thu a sawi.

Reds player zingah Mohamed Salah bawk chu mit fukna tur a ni dawn - Egyptian forward hian Premier League khelh ṭan niah goal riat a khung tawh a, ani aia Premier League khelh ṭan nia goal khung tam an awm lo.