Zanin dar 8:00-ah CYMA Mipa Volleyball final: Champion lai Hunthar Vs Champion rinkai Muanna Veng

CYMA leh MVA buatsaih LBS Suzuki 23rd Inter Branch YMA Volleyball Tournament 2024 final-ah zanin dar 8:00 hian champion lai Hunthar leh champion rinkai Muanna Veng an inkhel dawn.

R. Dengṭhuama Hall-ah Hunthar leh Muanna Veng mipui bakah volleyball tuimite an fuan khawm ang. Inkhel en man hi Rs 50 chauh a ni.

Record thar?

Volleyball thiam veng an sawi apianga hmaih thiang lo tur Hunthar hian kum 2004 khan a vawi khat nan CYMA Volleyball final an lut a, an champion hmasak ber erawh kum 2005 a ni thung. Hunthar hian kum 2009-ah nomawi chawi lehin inelna hnuhnung berah an champion bawk.

Kum 2022-a an champion chiah khan Maubawk nih rualin vawi thum an champion a, kumina an champion leh chuan record thar an siam dawn. Semifinal-a Chhinga Veng nena chhuna an inkhel pawh entu an tam a, final-ah phei chuan ṭawiawmtu an nei ṭha khawp ang.

Hunthar coach Lalthanzuala (TZ-a) chuan, "Muanna Veng hi team ṭha an ni a, an innghahna chu Valbuanga a ni. Chutihrualin Hunthar hi tun hma aṭanga defensive game khel thiam kan ni thung a, tun thlengin kan la chhawm nung. Tun ṭumah pawh hian min champion pui theih kan ring," tiin Vanglaini a hrilh.

Semifinal-ah Hunthar hian harsatna an tawk a, Chhinga Veng nen an inkhel tawk hle. Setter Lalremmawia chungah rinna a nghat a, mah se pressure sangah a chesual. Final-ah PVL-a setter anga hming chher Remsangzuala'n (Lalmama) Remmawia hna a rawn chhawk a nih pawhin a mak lo ang. Chutihrualin Huntharin defensive game a khelh dawn chuan R. Lalawmkima a dam ṭhat a pawimawh bawk.

Muanna Veng hun

Muanna Vengin CYMA Volleyball finalist leh Inter Village Volleyball champion lai Khawhai an lehthal a, final an lut. Vanlalṭanchhana (Valbuanga) telna team a ni a, Muanna Veng hi champion turin inrintawkna an nei ang.

CYMA Volleyball-ah pawh Muanna Veng hi an mikhual lo a, Hunthar champion hma chiahin kum 2018 khan an champion. An thiampuipa Valbuanga chuan, "Khawhai hi a harsa ber tur an ni," tiin Vanglaini a hrilh tawh a, tunah chuan a harsa ber tura ngaih chu an hneh tawh. Mahse, final boruak sangah CYMA Volleyball final ringawt pawh vawi sarih lo khel tawh Hunthar hmachhawn hi a châkawm lo ang.

Muanna Vengin ṭantu an nei ṭha dawn a, TNT awmna veng a nih avangin mi nawlpui ṭan an hlawh bawk. Valbuanga hming lansar bawk mah se Sadraka Fanai, Vanlalchhantluanga, setter Lalliankima leh Peter Lalpekhlua te hi tualchhung volleyball-a tawnhriat nei ṭha vek an ni. Heng player ṭha rual hian Muanna Vengah nomawi leh lawmna hawn an tum ang.