La Liga - A hun a thleng leh ta

European top flight league-a ngaihven hlawh pawl La Liga pawh Ningani zan aṭang khan khelh ṭan a ni leh ta a, league match hnih khelh nghal a ni. Ningani zan inkhel pahnihah hian chak zawk an awm lo!

Athletic Bilbao leh an mikhual Getafe te 1-1 in an inhnehtawk a, Real Betis leh Girona te 1-1 thoin an inhnehtawk. Nizanah inkhel pahnih awm chhunzawmin, Celta Vigo vs Alaves leh Las Palmas vs Sevilla a awm a, result kan hre hman lo thung.

Zaninah indinthar tum Barcelona an inlan dawn a, Hansi Flick hoa season hmachhawn tur Catalan club hian zan lai dar 1:00-ah Valencia an lenchilh dawn. Real Madrid chu Pathianni zan dar 1:00-ah an inlan dawn a, Real Mallorca an lenchilh ang.

Julian Alvarez an lakluh avanga ngaihven hlawh lehzual Atletico Madrid erawh August 19, Thawhṭanni zanah an inlan dawn chauh a, anni hian Villarreal chu khualmualah an lenchilh ve dawn thung a ni.

Barca fiahna chu

Barcelona-in an club tluchhe tawh tungding turin, club legend Xavi an ko kir a, season tluan a enkawl hmasak berah La Liga nomawi a chawipui. Mahse, season hman zawh takah Barca-in beisei an phak lo a, nomawi chawi nei miah loin season an khar.

Coach Xavi-a'n season laihawl daih tawh khan Barca enkawl chhunzawm a tum loh thu a sawi a, club thuneitute'n cham turin an thlem zui - Spanish coach hian a hmangaih club a hawisan thei lo a, an pute sawmna chu a pawm.

Xavi-a'n a hmangaih club hawisan thei loin a pawm a, mahse, an ban leh si! Barca thuneitute chet dan hi tam takin an dem a, tunah chuan Bayern Munich boss hlui Hansi Flick-a hoin season thar an hmachhawn dawn a, beiseina a sang.

Mahse, Bayern-ah hlawhtling viau mah se, Flick hi Germany national team enkawl tawh zinga ban hmasak ber a ni a, German club a enkawl lai anga club-te awh rawn coach a ni tawh lo. Catalan club hmanga hming chher leh tum mek a ni.

An la kim lo

Barcelona-in nipui transfer-ah player pathum an la lut tawh a, defender Iñigo Martínez chu free transfer-a lain, Girona forward Pau Víctor chu euro maktaduai 2.7-in an la lut bawk - thawm lian ber erawh €60mtd man Dani Olmo a ni.

Spanish attacking midfielder hi Euro 2024-a Spain champion theih nana player pawimawh a ni a, La Masia academy chhuak niin, Barca-ah a tlangnel nghal dawn.

Sum dinhmun chhe ve tak Barca hian an player tharte hi La Liga-ah an la ziak lut thei lo nia sawi a nih laiin Olmo bik hi an ziak lut tawh niin a lang a, Flick-a'n a duh chuan a chhawr thei ang.

Ronald Araujo, Ansu Fati leh Gavi te chu hliam vangin an inlan thei dawn lo chiang a, Pedri leh Frenkie de Jong dinhmun a la chiang lo bawk. Lamine Yamal-a'n squad a zawmna a la rei lo a, a la awl rih a nih pawhin a awm lo hran lo.

Hei le Real

UEFA Super Cup nen Real-in season bul an ṭan a, Vinícius Júnior, Rodrygo leh Jude Bellingham te nei sa club hian Kylian Mbappe an neih belh a, champion lai hi an nomawi humhim tura ringtu an tam hle - a awm lo hran lo.

Super Cup-ah Atalanta nen inhmachhawnin, player pali hian bul an ṭan vek a, a tirah beisei phak lo mah se, second half-ah erawh hmuhnawm tak an ni - Pathianni zanah Real Mallorca an hmachhawn dawn a, fan-ten inkhel hmuhnawm an beisei dawn.

Carlo Ancelotti-a'n Super Cup-ah an ṭhat dan ber a hmu chhuak tawh a, Bellingham-a'n tlarhnung puih aiin tlarhma nawrpui a thiam zawk tih a lang. Chuti a nih chuan tlarhma laiah Vinicius chu zalenna pek niin, midfield aṭanga tlarhma pui turin Bellingham dah a ni ang.

Mual vei lamah Mbappe awmin, ding lamah Rodrygo a awm ang a, Mallorca tan chuan, "Engtin nge kan chak theih ang?" tih ai chuan, "Engtin nge kan chelh theih ang?" tih chu zawhna fing zawk tur a ni.

A danglam lo

Real-in nipui transfer-ah player langsar tia chhal tur, chân em em an nei lo a, captain Nacho Fernandez chuan contract hman zawh vangin Al Qadsiah a pan a, striker Joselu chu Al Gharafa lamah kalin, loan-a an hawh Kepa Arrizabalaga chu Chelsea lamah a kir tawh bawk.

Hetihlai hian player pawimawh Toni Kroos-a'n inkhelh a chawlhsan avangin chhawr tur a awm tawh lo a, manganna tur erawh a ni lo. Real hian midfield-a inkawp turin Bellingham, Aurélien Tchouaméni leh Federico Valverde te an la nei a, an ṭha tawk.

Luka Modric pawh a chhuak dawn tawh emaw tih hnuah contract thar a ziak a, captain armband hlan ni nghal bawk mah se, a kum a tam tawh avangin a inlan tam a rinawm lo - Lucas Vázquez pawhin season khat dang khel turin contract a ziah belh.

Real hian thawm nei hat khawpa Mbappe an lakluh bakah Endrick an la lut bawk a, kum 18 mi lek ni mah se, Brazilian striker hian ram tan match 10 ngawt a khelh tawh avangin a ṭha thawkhat tih a chiang - Real tum hi a châkawm loh!