Nomawi humhim tum Inter Milan

Serie A chu zanin aṭangin khelh ṭan a ni leh dawn ta a, champion lai Inter Milan coach Simone Inzaghi chuan an nomawi kawl lai humhim ngei an tum tih a sawi chhuak.

Zanin dar 10:00 hian Genoa mualah Inter Milan hi an lenglut dawn - Inzaghi leh a nauten point thum nen a season bul ṭan ngei an tum a, season hmasa anga kal fal leh an duh a nih chuan a bul ṭan ṭhat hi a pawimawh.

Nerazzurri coach Inzaghi chuan, "Season thar inbuatsaihna hi kan nei ṭha tawk viau chuan ka hria, chuvangin season thar hmachhawn tur hian kan inpeih leh tawh hle a ni, phur takin match hmasa ber kan khel ang.

"Nipui laiin ka nauten Euro leh Copa America an khel a, ram tana feh chhuak ho pawhin team an rawn zawm leh tawh. Hliam vangin Stefan de Vrij a chawl mek a, midang erawh Genoa hmachhawn turin an inpeih," tiin a sawi.

Season hmasa khan Genoa hi an mikhual Inter Milan nen 1-1 in an inhnehtawk, nikum December thla mai kha a la nih avangin thil a la danglam tam lo mai thei, chuvangin Inzaghi naute tan thil a awlsam vek dawn bik lo.

AC Milan pawhin zanin dar 12:15 hian Torino an mikhual dawn, coach thar Paulo Fonseca kaihhruai hi eng ang takin nge an rawn khelh dawn hriatthiam a la harsa.

Kumin June 13 khan Fonseca hian Milan hi a zawm a, season thum daih contract a ziak. July 1 aṭang khan hna a thawk ṭan chiah a, a kaihhruaina hnuaiah training an la nei tam tawk lo. Inter Milan elphak tur chuan thapui an thawh a ngai ang.