Bournemouth-in club record-in Evanilson la lut dawn

Premier League club Bournemouth chuan an thiampuipa Dominic Solanke an chân hnuah an squad an thuam chak ve nghal a, Porto aṭangin striker Evanilson chu an club player man to ber ni turin an la lut dawn.

Cherries hian pound maktaduai 40.2-in Portuguese club hi inremna an neihpui a, a man atan £31.7mtd an pe phawt ang a, a bak £8.5mtd hi a khelh ṭhat dan a zira pek belh leh tur a ni. Evanilson hian nimin khan medical a nei nghal a, he thuziak i chhiar meuh chuan an inrem fel tawh hial mai thei.

Kum 24 mi Brazilian striker hian Brazilian club Fluminense aṭanga a professional zinkawng zawh ṭanin, kum 2020 khan Porto a zawm a, Portuguese club tan match 150-ah goal 60 khungin, assist vawi 21 a nei tawh.

Brazil tan vawi hnih inlan tawhin, season hman zawh takah khan match 42-ah goal 25 khungin, assist vawi sarih a nei a, 2021-22 season khan Porto hi Primeira Liga-ah a champion pui a, Taça de Portugal (3), Taca da Liga (1) leh Supertaça Cândido de Oliveira (1) ah te a champion pui bawk.