Che fuh thei lo Everton

Britannia Stadium-ah Nilaini zan khan Everton chuan Stoke City an len chilh a, 2-0 in an tlawm. Manager Roberto Martinez-a naute an chefuh lo tluang zel.

Mikhual Everton-in inkhel thunun mah se goal an khung thei lo. Stoke forward Victor Moses-a'n first half-a goal awmchhun a khung a, minute 32-naah Phil Bardsley cross chu Moses-a'n pui zetin a tauh goal.

Second half-ah pawh field chhungah thil thleng langsar a tam lo. Minute 84-naah Mame Biram Diouf chuan a thawhrah aṭanga Marko Arnautovic-a goal ban pet per chu nang fuhin Stoke goal hnihna a khung a. 2-0 in inkhel a tawp.

Everton hian tunhnai Premier League match nga an khelhah chak hmel an hmu zo lo a, tun season-ah league match rukah chauh hnehna an la chang. Everton goalkeeper Tim Howard-a'n a match hnuhnung 11-ah goal a chhuah vek. Besei pha lo Everton hi relegation zone aṭangin point ruk chauhin an him rih a ni.

Everton manager Roberto Martinez chuan, "League match 10 khelh hmabak kan la neih hi kan tan chuan final vek a ni tawh. Kan la beidawng lo, theihtawp kan chhuah chunzawm zel ang," tiin a sawi.