Chelsea leh City te'n nomawi inchuh zel

Premier League hmahruaitu Chelsea-in khualmualah West Ham 1-0 in an hneh a, Manchester City-in Etihad Stadium-ah Leicester City 2-0 in an hneh ve bawk. Champion tuma inum boruak a sang zel.

Chelsea hi City aiin point ngain an sang a, match khatin an khel tlem cheu. City tan champion tur chuan chak zel bakah Chelsea chak loh chan a ngai.

Chelsea-in team lian ti a sawi theih zingah Man­chester United, Arsenal leh Liverpool an la tum dawn a, an hmabak a la hautak takzet.

City hmabak a awlsam bik lo, Tottenham Hotspurs leh Manchester United khelh an la hmabak.

Champion hnaih Chelsea

Blues-in Jose Mou­rinho lo kir leh hnua an title hmasa ber League Cup an chawi a, an champion zawh hnua an game hmasa berah minute 22-naa Eden Hazard-a goal hmangin West Ham 1-0 in an hneh nghal.

Upton Park-a inkhelah hian Chelsea aiin West Ham tlar hma goal bawh a na zawk a, mual neitu tan Sakho leh Enner Valencia te'n hun ṭha nei mahse, goal-ah an chantir zawh loh avangin a vanduai zawkah an ṭang ta a ni.

Eng nge an sawi?

West Ham manager Sam Allar­dyce chuan, "Kan khel ṭha hle na a, Chelsea keeper (Thibaut Courtois) khan a khel ṭha em a ni. Ka hmuh dan chuan Hazard goal kha offside a ni," tiin an vanduai thu a sawi.

Chelsea manager Jose Mourin­ho chuan, "Ka naute khan an khel ṭha takzet a ni. Upton park-a West Ham tum hi a hautak ṭhin em em a, kan chak thei kha a lawmawm hle a ni," a ti.

Beisei nei City

Kar hmasa lawka Liverpool laka an chetsual hnuin City an chesual nawn duh tawh lo. Etihad Stadium-ah table mawngphah luahtu Leicester City 2-0 in an hneh.

Manchester City tan captain Vincent Kompany hmuh tur a awm lo a, tunhnaia khel ṭha lo defender hi City manager Manuel Pellegrini chuan bench-ah a ṭhut tir.

City tan Swansea City striker hlui Wilfried Bony a, tlar hmaah Sergio Aguero nen an inkawp. Bony hian first half-ah Leicester winger Jeff Schlupp a ti tlu a, penalty a chawi loh avangin a vannei takzet.

City tan David Silva chuan minute 45-ah goal a khung a, hei hi minute 88 naah James Milner chuan belhchhahin 2-0 in Manchester City a chak zawkah an ṭang ta a ni.

Eng nge an sawi?

Manchester City manager Manuel Pellegrini chuan, "Tun hnaiah kan beisei ang result kan hlawhchhuak thei lo a, insiam rem kan mamawh a ni. A pawimawh ber chu point thum hlawh chhuah a ni a, point thum kan hlawh chhuak thei kha a lawmawm hle a ni," tiin Kompany khelh loh chhan chu insiam rem an ngaih vang niin a sawi.

Manchester City manager Nigel Pearson chuan, "Penalty kha vawi thum lai hmu thei kan ni a, mahse pek kan ni lo vek. Video technology kan hman hi a hun tawh tak zet a ni," tiin penalty pek an ni lo chu na takin a sawisel.