Mission Veng leh Chaltlang fiahna

Tlai dar 4:00-ah in­ngam tura beisei Mission Veng Vikings leh Chaltlang Ryders te Samsung 3:16 Plan Solution Mizoram Super League-ah an inkhel dawn.

Chaltlang assistant coach Marc Lalthlamuana chuan, "MSL awm hma season hian Ryders hi league-ah ṭum hnih kan hneh a, MSL a nih tak hnua kan hneh lohna chhan ngawt tur a awm lo," tiin chak hmel an hmuh ngei a beisei thu a sawi.

Ryders boss ṭawng­kam vangin Mission Veng Vikings coach Reu­ben Lalchhandama a zam lo. Chanmari tlangval Chd-a chuan, "Kawng engkimah kan ṭha zawk ang," tiin chak ngei an tum thu a sawi.

Chaltlang Ryders hian hneh an la nei lo a, vawi hnih khelh tawhah Zarkawt BCA leh Tuikual South lakah chiang takin an tlawm. An khingpui tur Mission Veng Vikings hi Khatla TBL laka mualpho an ni a, match hmasa bera Zarkawt Serpents hnehtu Vikings hian Chaltlang hneh hi team phur nan an mamawh. Ngam leh ngam inkhel tur hi a ngaihnawm dawn.

Mission Veng tan Moses Zoremmawia leh Lalrina Renthlei te an che ṭha ṭhin a, Lalrempuia leh Lalnunpuia te'n an ṭawiawm ṭhat a pawi­mawh. Chaltlang lamah Lalmuanpuia Zote (Mapuia) a langsar ṭhin, midang an pen chhuah loh chuan Ryders tan chak a huphurhawm ang.

Chaltlang enkawltu Marc chuan sawi chhun­zawmin, "Kan in pass tam tawk lo a, chak ngei tumin training drills pawh kan thlak. Ka sawi duh chu Chaltlang Ryders hi kan la tlawm lo, Vikings hi kan hneh lo a nih pawhin mipuiin min lo thlir se kan la chak chho em em ang," tiin hma­bak a eng zawngin a thlir.

Mission Veng thluak bur Chd-a chuan, "TBL kan hneh loh chhan kha defence ṭhat loh vangah kan ngai a, kan zir nasa hle. Kan chak loh vang khan ṭan kan la thar a, kan chak loh nawn loh nan theihtawp kan chhuah a ni," tiin chak ngei an tum tih a sawi.