Laipui kap puaktu Giroud

Nilaini zan Premier Lea­gue inkhelah Arsenal-in an khingpui Queens Park Rangers chu 2-1 in an hneh a, tunhnaia striker khel ṭha Olivier Giroud-a'n laipui a kap puak zel.

First half-a goal a luh loh hnuah Arsenal French forward Giroud-a'n minute 64-naah goal hmahruai a khung a, player taima Alexis Sanchez-a'n minute nga ral hnuah goal hnihna a khung. QPR goal awmchhun hi minute 82-naa Charlie Austin-a thun a ni.

Arsenal goal hnihna khung tu Chilean forward hian Arsenal a zawm hnuin khel ṭha hle mah se goal khung loin thla khat zet a awm tawh a, QPR laka a goal khung hi January-a Stoke City laka goal a khung hnua a khung lehna hmasa ber a ni.

Inhliam vanga tun season-a match khel tam lo Giroud hian tunhnai match nga a khelh aṭangin goal nga a khung a, tun season Premier League-ah goal 10 a khung tawh bawk.

QPR mana­ger Chris Ramsey chuan, "Khel ṭha tak chung si a point kan hmu zo lo kha a lungchhiat thlak hle a ni. Ka player-te khelh danah ka lawm hle a, season tharah helai hmunah hian kan la inkhelh leh ngei ka beisei a ni," tiin club enkawl zel leh Premier League-a cham zel a tum thu a sawi.

Arsenal manager Arsene Wenger chuan, "QPR khan an khel ṭha tak zet. A tir lam minute 25 chhung phei kha chu min dang chat hneh hle. Inkhelh chawhnu lamah hma kan sawn hret a, point thum kan hlawhchhuak kha kan vannei takzet a ni," tiin a sawi.