Spurs beiseina a la nung

Tottenham Hotspurs-in season thara Cham­pions League khelh an tumna chu an chhawm nung zel a, Nilaini zan khan White Hart Lane-ah an khingpui Swansea chu 3-2 in an hneh hram.

Goal nga luhna inkhelah Nacer Chadli-a'n a khung hmasa ber a, minute 7-na lekah Spurs hmahruaina goal a khung. Chadli hian tun season-a inelna hrang hrangah a club tan goal 10 a khung tawh.

Swansea an zam bik lo, Ki Sung-yeung hmangin an si phurh chu minute 19-na lekah an sut ve nghal mai a. First half-ah si khat ve ve an khung.

Second half-ah Swansea lamin goal thun an tum luatah an goal an venghim ṭha lo. Midfielder Ryan Mason-a'n minute 51-naah Spurs goal hnihna a khung a, Premier League-a a goal thun hmasa ber a ni.

Tottenham dinhmun sawh nghet nan minute 60-naah Andros Townsend -a'n goal thumna a khung a, 3-1 a ni. Swansea tan Gylfi Sigurdsson-a'n minute 89-ah goal khung ve mah se goal dang khungna hun a awm tawh loh avangin 3-2 in Spurs an chak ta a ni.

Tottenham manager Mauricio Pochettino chuan, "3-2 ni mah se shot ṭhahnem tak kan nei a, 60% ball possession kan nei a, hun tawpah chiah khan harsatna kan tawk. Ka player-te khelh danah ka lungawi a, chak kan phu a ni," a ti.