Van'nei' Gaal-te an chak

Sir Alex Ferguson-a hun laiin injury time-ah Manchester United an chak fo a, Louis van Gaal-a hnuaiah chuan injury time kher ngai loin minute 90 a ral chuan vannei takin an chak leh mai ṭhin.

Nilaini zan khan St James Park-ah Manchester United-in minute 89-naa Ashley Young hmanngin Newcastle United 1-0 in an hneh a, Dutch keeper Tim Krul tihsual zara lut a ni.

Manchester United-in an forward Robin van Persie leh James Wilson te squad-ah awm lo mah se goal mamawhna inkhelah Colombian forward Radamel Falcao chu bench-ah hman lohin a ṭhu tluan. Premier League player manto ber Angel Di Maria pawhin field-ah a thiamna a lantir thei lo a, Sunderland an khel ṭum ang thoin lakchhuah a ni.

Newcastle aiin Manchester an vannei zawk a, inkhelh ṭan tirh lamah United defender Chris Smalling-a'n French forward Emmanuel Riviere laka a foul chu penalty ni ngeiin lang mah se mualneitu hi penalty pek an ni tlat lo.

Ṭum dang ang bawkin Man­chester United-in awmze nei loin ball an chang tam a, mamawh hunah keeper David de Gea a che ṭha leh bawk. Minute 89-naah United captain Wayne Rooney tihbuai vangin Mehdi Abeid chuan hnai takah keeper Krul a pe let a, Dutch keeper chuan a lirin penalty area-a awm Young chu pass a, English midfielder hian January 2004 hnuaia a vawi khatna atan a pet goal a, Manchester United 1-0 in a chak.

Newcastle United manager John Carver chuan, "Man Utd tum chuan tihsual a thiang lo. Theihtawp chhuahin bei mah ila a tawpa Abeid-a tihsual avangin point kan hlawhchhuak ta lo," tiin a sawi.

Manchester United manager Louis van Gaal chuan, "Minute 90 chhung inkhel kan thunun a, tun season-a kan khelh ṭhat ber ṭum a ni hial ang. Khualmualah hnehna kan chang a, kan phu a ni. Goal chance kan neih ang kan khung lo a, chutihrualin David De Gea-a'n dang ṭha lo se chuan chak lo thei kan ni," tiin chak an phu thu a sawi.