Liverpool an vul zel

Anfield-ah Liverpool-in Jordan Henderson leh Daneil Sturridge te goal hmangin Burnley 2-0 in an hneh a, league match 12-ah hneh loh an tawng lo. An khingpui Burnley erawh league match 12-ah vawi khat chiah an la chak thung.

Inkhel ṭan tirh phat aṭangin Liverpool-in game an thunun zawk a, inkhel ṭan aṭanga second 30 na lekah inhliam hnua a vawi khatna atana starting eleven chang Sturridge-a'n hun ṭha a nei nghal a, mahse Burnley goalkeeper Tom Heaton-a'n a dang hman.

Liverpool tlar hma an hlauhawm chhunzawm zel a, tlar hmaa intlar Sturridge, Phillipe Coutinho leh Raheem Sterling te'n Burnley defender an chhaih buai hneh hle.

Minute 29-naah Liverpool-in goal an thun ta nge nge a, Coutinho ball aṭanga per chu yard 20 vela hla aṭangin Henderson-a'n chiang takin a pet goal.

Gerrard awm loh vanga captain Hendo hi a khel ṭha a, minute 51-naa Sturridge goal thun tur a siamsak leh bawk. Henderson hian tun season-ah assist vawi sarih lai a nei ta.

Burnley tlar hma te'n Liverpool keeper Simon Mignolet tan hna an siam sak ve thei meuh lo a, Liverpool nena sawi zawm hlawh mek Burn­ley striker Danny Ings hmuh tur a vang hle. Hun tawpah inkhel thununtu Liverpool 2-0 in an chak.

Eng nge an sawi?

Liverpool boss Brendan Rodgers chuan, "Kan khel ṭha hlein ka hria. A bik takin Hendo khan a khel ṭha takzet a, a goal thun leh Sturridge goal khung tur a siamsak dante kha ropui tak a ni," tiin English midfielder chu a fak.

Burnley boss Sean Dyche chuan, "Liverpool khan an khel ṭha takzet a, chance ṭha tak tak an insiam thei a, chak kha an phu a ni," a ti.