Barca-in Copa del Rey final an thleng
Copa del Rey semifinal second leg Nilaini zana Estadio El Madrigal hmuna khelhah Barcelona-in an khingpui Villarreal 3-1 a hnehin final an lut.
Cataltan club hian Espanyol hnehtu Athletic Bilbao nen May 29 zanah final an khel ang.
Barca an chungnung
First leg-ah Barcelona hian 3-1 thoin Villarreal hi an lo hneh tawh a, inkhel pahnih belhkhawmah Barca hi 6-2 a chak-in final an lut chiang hle.
Villareal midfielder Tomas Pina chu Spanish midfielder Sergio Busquets a tih thluk vang leh Neymar laka a foul avangin hnawh chhuah a ni a, Busquets hi chawlhlawk hmain hliam vangin lak chhuah a ngai hial.
Mikhual Barca-in bul an ṭan ṭha a, an khingpui Villareal insiamrem hmain Brazilian Neymar-a'n minute hnihna lekah goal hmahruai a khung. Jonathan dos Santos-a'n Villareal beiseina siam turin minute 39-naah goal khung ve mah se chak turin goal thum dang an mamawh. Harsatna belchhah turin first half tawp hma minute thum chauh a awm tawh tihah Villarreal midfielder Pina chu hnawhchhuah a ni.
Player 10 a khel Villareal tan second half-ah beisei tur a tam tawh lo. Liverpool striker hlui Luis Suarez chuan minute 73-naah Barca goal hnihna a khung a, minute 88-naah Neymar-a'n he inkhel a Barca goal thumna leh ama goal hnihna a khung belh leh bawk. Goal dang luhna hun a awm tawh lo, inkhel hmasa nen a belh khawmin Barca 6-2 in an chak.
Eng nge an sawi?
Goal hnih khung tu Neymar chuan, "Final kan thleng thei hi ka lawm hle a ni. Villareal kha team ṭha tak an ni a, inkhel bul kan ṭhat avangin kan tan inkhelh a awlsam phah a ni. Kan champion zui theih ngei ka beisei a ni," tiin a sawi.
Barca boss Luis Enrique chuan, "Ka beisei ang ngeiin inkhel kan thunun a, chak result kan nei hi ka lawm hle. Zanin a Pina chet dan kha a mawi lo hle a, ṭul lo takah kan player a hliam a, mahni inthunun hi player tinin an zir tur a ni," a ti.
Ngaihnawm
Copa del Rey-ah Barcelona-in final thleng turin match riat an khel a, an chak vek. goal 31 khungin goal nga chauh an chhuah. Kum 1926 hnuah hetiang a chak vek hi an la nei ngai lo a, an vawi khat neihna a ni. Inelna hi knockout ni mah se double leg-a khelh a nih avangin final chung siin a chak loh theih.
Luis Enrique-a'n Barca a enkawl hnua final a thlen na hmasa ber a ni a, Copa del Rey-ah hian Barca hi vawi 26 an champion tawh a, vawi 27 nan a champion pui thei dawn em tih chu kan hmu thuai ang.