Mizoram 1-0 Kerala Valpuia'n Mizoram a vawrh sâng

Santosh Trophy-ah champion lai Mizoram an kal zel. Nimin khan Mizoramin F. Lalrinpuia (Valpuia) goal hmangin Kerala 1-0 in an hneh a, point ruk hmuin Group B hmahruaitu an ni.

Mizoram hian Inrinniah Railways an hmachhawn ang a, semifinal lut turin draw chiah an mamawh tawh a; Thawhṭanniah Goa nen an la inkhel leh bawk ang.

Mizoram hian nikuma Santosh Trophy qualifying round Lammuala khelh aṭang khan hneh loh an la tawng lo a, Santosh Trophy bakah Dr TAo Football leh National Games-ah te an champion tawh. 2015 Santosh Trophy bikah Mizoram hian quali­fier aṭangin goal an la chhuah lo.

Inkhelh hma chanchin

Jalandhar-ah khua a ṭha a, Guru Gobind Singh Stadium-ah inelna neih theih a ni. Mizoramin Delhi an hneh ṭuma starting eleven aṭangin player pahnih an tidanglam.

Ramthar Veng tlangval, Dinthar FC midfielder Johny Lalfakzuala aiah Mizoram Police FC captain V Lalṭanpuia a khel a; nikum lama captain Zico Zoremsanga aiah Ramhlun South lama a ṭhenawm pa Malsawmfela a lut bawk.

Goal a lut lo

First half-ah Kerala defender tihsual zarah H. Lalmuankima'n goal khungna chance a nei a, keeper chauh a hmachhawn chungin goal zawnah a pet lo. Bawngkawn tlangval, Chanmari FC winger hian captain Samson Ramengmawia nena wall pass an neih hnuah goal khung theihna tur chance a hlah leh a, MK-a hian Mizoram Police forward F. Lalrinpuia pass a pet over bawk.

First half-ah hian MK-a bakah Mizoram Police winger Lalbiakhlua'n goal khung theihna tur a nei a, goal zawnah a pet bik lo. Kerala pawhin chance vawi hnih an nei a, Mizoram goal chance aiin a hlauawm zawk. Aizawl Venglai tlangval, Chanmari FC keeper Lalawmpuia a thawk ṭha a, Mizoram an him hram. Hun chanve hma lamah goal a lut lo.

A goal ta

Second half-ah Mizoram an hlauawm hmasa a, Ronald Zothanzama cross chu Valpuia'n goal-ah a chantir thei lo a; captain Samson-a'n chance a hlah zui bawk.

Tlar hmaah vanneihna zawngin Sawmfela aiah Salem Veng forward Joseph Lalnunpuia luhtir a ni.

Minute 61-naah goal a lut a, Kerala defender pahnih leh keeper te'n Valpuia an dang zo lo a, goal mawi zet a thun. Republic Veng tlangval goal hmangin Mizoramin hma an hruai.

Goal luh aṭanga minute sarihnaah Kerala-in Mizoram goal ban an pet per a, champion lai goal a him chhunzawm zel a, Kerala-in chance dang an nei tawh lo.

Hun tawp lamah Mizoram an khel ṭha a, Police winger Biaktea aia lut Chanmari FC player Lal­dingngheta'n chance ṭha ṭum hnih a hlah a, Valpuia freekick hlawhchhuah ṭha tak MK-a'n a hmang ṭangkai thei lo bawk.

Coach thukhawchang

Mizoram coach H. Vanlalthlanga chuan, "Kan thiamna tak tak kan lantir thei lo. Field a tet avangin chet ran a ngai a, kan khingpuite an lian si a, kan game structure-ah kan bel lehzual a ngai a ni. Valpuia a khel ṭha fal deuh a, player dang an la hmuhnawm tawk lo," tiin an khelh danah a la lungawi lo.

Thlanga chuan, "Jalandhar leh Chandigarh aṭangin Mizo engemaw zatin min rawn ṭawiawm a, an chungah kan lawm tak meuh meuh a ni. Semifinal lut turin kan dinhmun a ṭha a, Mizo mipui ṭawngṭaipuina kan ngen a ni," tiin a sawi.

Manager khauh dawn

Mizoram team manager Vanlalngheta chuan, "Kan player-te'n 100% concentration an pek kan duh ber. Chumi tibuai thei a awm kan phal lo a, zanah dar 9:30-ah an mobile phone kan la khawm zel tawh dawn a, meng rei fâl an awm kan rem ti lo. Discipline lamah harsatna kan tawk lo a, thuawih leh inpe tak vek an ni hi kan lawm hle," a ti.

Mizoram fans chungah a lawm a, "Kan rin phak piah lam a ni e. Min ṭan dan leh min ṭawiawm ṭhat dan hi lawmthu sawi mai loh tih theih kan nei lo. Player-te an phûr phah a, kan lawm khawp mai," a ti.

Mizoram manager chuan khelmual pahnihah an khel tawh a, vawi khat khelhna a nih ve ve avangin an la hmang thiam tawk lo niin a sawi bawk.

Inkhel dang

Vawiin hian Group A-ah point la hmu lo Assam leh point li hmu tawh Services an inkhel ang a, Group B-ah Goa leh Delh-te an inhmachhawn bawk ang.

Nimina Group A inkhelah West Bengal-in Maharashtra 2-1 in an hneh a, champion ngun ber West Bengal an kal tluang hle.

Tute nge inlan?

Goalkeeper : Lalawmpuia

Defenders : Lalrinzuala Khiangte (Lallawmzuala 33'), Ronald Zothanzama, Lalrinchhana Tochhawng, Lalruatthara.

Midfielders : Lalbiakhlua (Laldingngheta 73'), Samson Ramengmawia (Captain), V.Laltanpuia, H.Lalmuankima

Forwards : Malsawmfela (Joseph Lalnunpuia 57'), F.Lalrinpuia