Quarter-final kan thleng hi kan vannei - Guardiola

Bayern Munich manager Pep Guardiola chuan DFB-Pokal quarter-final an thleng thei chu an vanneih vang nia a hriat thu a sawi.

Nilaini zan khan Bayern-in an khingpui Eintracht Braunschweig chu 2-0 in an hneh a, DFB-Pokal last-16 an paltlang. German champion tan hian David Alaba leh Mario Gotze te'n goal khat ve ve an khung.

Bayern hian Bundes­liga-a an game hnuhnung pathumah goal 18 zet an khung avangin Brauns­chweig hmaah goal ṭhahnem tak khung leh tura rin leh beisei an ni a, mah se goal hnih chauh an khung.

Bayern boss Guardiola chuan, "Mi ṭhenkhat chuan goal tam zawk a chak turin min ngai a ni maithei, mahse football-ah chuan rin ang leh beisei angin thil hi a kal vek lo a, zaninah pawh khan goal khung na hun ṭha chu kan hmu nual. Mah se goal hnih bak kan khung thei lo a ni. Game zawng zawng hi awlsam a awm lo a, kan inkhelh apiangah theih tawp kan chhuah a ngai vek a ni," tiin inngaitlawm takin a sawi.

Pathianniah khian draw neih a ni dawn a, quarterfinal hi April 7-8 ah khelh tur a ni. Bayern Munich bakah Bayer Leverkusen, Hoffenheim, Freiburg, Borussia Dortmund, Wolfsburg, Arminia Biele­feld leh Borussia Monchenglad-bach te'n quarterfinal an lut.