Zarkawt BCA hmaah Tuikual South

Samsung 3:16 Plan Solution Mizoram Super League-ah Zarkawt BCA in an khingpui an hneh zel a, zanin dar 8:00 hian Hawla Indoor Stadium-ah Tuikual South an hmachhawn dawn.

Zarkawt BCA hian MSL match hmasa berah Chlatlang Ryders an sawp. An match hnihnaah Zarkawt derby khelin Zarkawt Serpents 75-70 in an hneh leh a, champion tura rinkai ni pha an ni. An khingpui tur Tuikual South-in Khatla TBL hneh loin bul ṭan mah se match hnihnaah Chaltlang Ryders an sawp.

BCA shooting guard Zorinsanga a pawimawh leh ang, Ramthar veng tlangval hi Zarkawt Serpents an tum ṭuma points 16 hlawhchhuaktu a ni.

Tuikual South hi playoff an khelh aṭang tawha thawm nei lian an ni a, veng mipui thlawpna pawh an hmu ṭha hle. Chaltlang an sawp ṭumin captain F.Zodinthara'n a theihna a pholang a, points 22 hlawhchhuakin rebound 19 ngawt a rawn nei. MSL round 2-ah Tuikual forward Dina aia che ṭha an awm lo.

Eng nge an sawi?

Tuikual South BC coach KC Lallian­tluanga chuan, "BCA hi kan huphurh em em hran lo. Team ṭha pangngai tak an ni a, hneh turin kan theihtawp kan chhuah ang," a ti.

MSL awm hmaa BCA coach KC-a chuan, "Dina, Mafaka leh ChP-a te hi an ṭangkai leh dawn. Tawnhriat nei ngah player ṭhah an ni a, an tawnhriat hi kan ṭangkaipui ṭhin a ni," a ti.

KC-a chuan khawtlang mipui in an ṭawiawm ṭhat leh ngei a rin thu sawiin an fan-te chu an chakna hnar ber an nih thu a sawi.

Zarkawt BCA Asst. Coach Lalruatfela chuan, "MSL chinah hi chuan team tin hi kan ṭha tlang tawh a, Tuikual South hi huphurh lo mah ila zuam sual theih an ni. Chuvang chuan kan fimkhur ang. Kan players zingah inhliam neuh neuh kan ngah khawp mai a, hei hian min ti buai hle. Tuikual South kan khelh hunah pawh full squad in kan khelh theih ka ring lo. Mahse, hei hian kan khelh hmasak aia ṭha a khel turin min fuih phur dawn a ni," a ti.

Afela chuan Zarkawt BCA-a lo khel tawh ṭhin tuna Tuikual South player ni ta Vanchuangpuia chungchang sawi langin, "Tuikual South-in kan hnen aṭanga an lak dawn kha chuan boruak kha a awm ve hat a, MSL players zingah ChP-a hi a to ber a ni hial maithei. Player ṭha tak, game thlak danglam thei a nih avangin kan ui em em a, mahse kan ui bet zo ta lo a ni," a ti.

Afela chuan sawi chhunzawmin, "ChP-a kan veng ang, chutihrualin Tuikual South-in Dina leh Mafaka te an kawl avangin ChP-a ven bik a sual thei bawk," tiin an player hlui pawimawhna a sawi lang.

BCA assistant coach hian Zarkawt derby-ah duh anga fan-te ṭawimawmna an neih ṭhat loh avangin Tuikual South hmachhawn hunah ṭha zawka ṭawiawm turin Zarkawt mipui a sawm.