Footballer hausa ber Ronaldo

Ningani khan football website lar Goal.com chuan footballer hausate hming a tarchhuak a, '2015 Goal Rich List'-a hming hmasa ber chu Cristiano Ronaldo a ni.

2014 khan Ronaldo hi footballer hausa bera puan a lo ni tawh a, David Beckham thlaktu a ni. Ronaldo ang bawka Manchester United leh Real Madrid tana khel tawh Beckham hi football khelh a chawlhsan thleng khan footballer zingah a hausa ber a, elphatu an awm ngai lo. Tun hnaiah erawh player pahnih an langsar a, an hming chu Ronaldo leh Lionel Messi te an ni. Player ṭha pahnih hi field pawn leh field chhungah an ropui dun a, player dangin an tluk pha lo hle.

Hei le player hausa ho chu...
1. Cristiano Ronaldo - Portuguese forward hian September 2013 khan contract a pawt sei a, kum khatah euro maktaduai 18.2 a la lut. 2014 Ballon d'Or a dawn avang te, Champions League leh Club World Cup-a Real Madrid a champion pui avangin bonus ṭha hnem tak a dawng bawk. Sponsor-te aṭangin euro maktaduai 25 vel a la lut a, tunah hian Toyota, Herbalife, Emirates, Castrol, Samsung, Soccerade, Emporio Armani, Konami, Banco Espirito Santo leh KFC te nen inremna an nei mek. Nike-ah contract a neih bakah ama puala thawmhnaw company CR7 a nei a; Museu CR7, Seven nightclub, Algarve, mobile app, Mobitto bakah a in leh lo hlut zawng chu euro maktaduai 30 chuang a ni bawk.
2. Lionel Messi - Argentine forward hi tax huam tel lo a, a contract ziah dan aṭanga thlir chuan khawvelah a hlawh tam ber. Hming hliauna a neih loh avangin sponsor
aṭangin a la lut tam a; Adidas, EA Sports, Ooredoo, Samsung, Lay's, Audermars Piguet, Gillette, Dolce & Gabbana, Head & Shoulders, Gatorade leh Pan Bimbo-ah te contract a nei mek.
An khua Rosario khaw pawn hretah in ropui tak a nei a, chu hmunah chuan beach, a golf course leh sports complex changtlung tak a nei. Tun hnai mai khan company pakhat 'Limecu Espana' board a nihna aṭangin a bang a, he company hlutna hi euro maktaduai 11.7 a ni a, a unaupa Rodrigo-a'n a enkawl mek.
3. Neymar - Barcelona forward hian Brazil-in World Cup an thlen a hlawk pui a, endorsement aṭang ringawtin euro maktaduai 37 a la lut. Amah sponsor-tu zingah Nike, Panasonic, Claro, foot odour-stopper Tenys-Pé, underwear brand Lupo, fizzy drink Guaraná Antarctica, Unilever, Volkswagen, Santander, Red Bull, Heliar (car batteries) leh mobile app Palpiteros te an tel. Tunah hian Neymar hian kum khatah euro maktaduai 8.8 a hlawh mek.
4. Zlatan Ibrahimovic - Swedish forward hi kum 19 leka upa a nihin Malmo sporting director Hasse Borg-a'n euro maktaduai 8.7-in Ajax-ah a hralh a, a hlutna a tam dawn tih chu a chiang reng mai. Nivea, Xbox, Volvo leh Dressman te a tih larna aṭangin pawisa a la lut a, a lehkhabu 'I am Zlatan' aṭangin euro maktaduai 8 a la lut bawk.
5. Wayne Rooney - England captain Rooney hi Premier League player zinga hausa ber a ni. Nikum season tawp khan a hlawh tih pun a ni a, kum khatah euro maktaduai 18.9 a la lut. Field pawn lamah pawh Nike, Samsung leh Harper Collins aṭangin euro maktaduai 5.4 a la lut bawk. Prestbury-ah in euro maktaduai 6 man a lei a, a chei ṭhat nan a lei let hnih a hmang zui bawk.
6. Kaka - 2007 Ballon d’Or dawngtu Kaka hian Real Madrid-a kum li a cham chhung khan euro maktaduai 35 a la lut a, a club hlui AC Milan-a a let leh hnuah a hlawh a chanve hlawkin tla hniam mah se Sao Paulo (€2m) leh Orlando City (€6.3m) aṭangin a hui hlut hnem a, MLS player hlawh tam ber a ni mek. Pepsi, Adidas, Samsung, Gillette leh Armani ah te contract a nei mek a, Manhattan, Natal, Madrid leh Milan-ah in
ṭha tak a nei bawk.
7. Samuel Eto'o - Cameroon forward hausakna chanve hi Russian club Anzhi Makhachkala tana kum hnih a khelh chhunga a hlawhchhuah a ni. Hemi hma hian Champions League-ah Barcelona (2009) leh Inter Milan (2010) a champion pui a, Barca-ah khan kum khata euro maktaduai 10 a hlawh a, Chelsea-a a khelh zawk chhung khan kum khatah euro maktaduai 5 a la lut. Eto'o hian Puma leh Ford aṭangin sum ṭhahnem tak a hui lut bawk.
8. Raul - Real Madrid fapa rangkachak tia sawi ṭhin Raul hian Bernabeu-a kum 16 chhung a cham chhung khan player hlawh tam ber zing ami a ni char char a, kum khatah euro maktaduai 7 la lut ang vel a ni. German club Schalke-ah kum hnih khelin euro maktaduai 14 a la lut a, Qatari club Al-Sadd ah kum hnih khel lehin euro maktaduai 10 a hlawh leh bawk. New York Cosmos-ah Frank Lampard te nen an khel ho dawn a, youth academy hotu a ni bawk ang. Raul hi field pawn lama eizawnnaah pawh a hlawhling hle.
9. Ronaldinho - Brazilian forward hian kum 2005 khan Ballon d'Or a dawng a, Europe a chhuahsanna pawh kum li a ral ta. Chutichung chuan Ronaldiho hian pawisa ṭhahnem tak a la lut. Mexico club a Queretaro-ah a chetṭhat dan a zirin kum khatah euro maktaduai 2.5 vel a lak luh rin a, hemi hma hian Atletico Mineiro-ah kum hnih khelin kum khatah euro maktaduai 2.5 a la lut. Barcelona tana a chet ṭhat avang leh Nike nena an inremna avangin Ronaldinho sum dinhmun hi tun thlengin a la ṭha hle.
10. Frank Lampard - English midfielder hi kum 13 chhung Chelsea-a a khelh chhung leh Manchester City tana kum khat a khelh chhung hian a hlawh aṭangin euro maktaduai 35 a la lut a. Sports equipment siamtu langsar Nike leh Adidas-ah contract a nei ṭhin bawk. Esher-a a in hralhna aṭangin euro maktaduai 5 a la lut a, Chelsea-a a in hlut zawng hi euro maktaduai 13 ang vela chhut a ni. Tin, Docklands leh Barcelona-ah apartment a nei bawk.
11. Bastian Schwein­steiger - German midfielder hian 2012 aṭang khan kum tinin euro maktaduai 10 a hlawh aṭangin a la lut. Adidas leh Audi tan ambassador a ni a; Right Guard, Funny-Frisch crisps, Nivea leh Beats 'Dr. Dre.' aṭangtein pawisa a la lut bawk.
12. Rio Ferdinand - QPR defender hian kum 10 chhung Manchester United tan a khel a, amaherawhchu a pawisa lak luhna tam zawk erawh field pawn lam daih a ni. Restaurant engemaw zat a neih zingah Machester khuaa restaurant lar 'Rosso' a tel a, Music label 'White Chalk' leh Fashion label '#5' a nei bawk. Nike, BT Sport leh Jaguar Academy of Sport tan amabasador a ni a, Cheshire, London leh Caribbean-ah in ṭha tak a nei bawk.
13. Gigi Buffon - Italian keeper hian kum 13 chhung Juventus tan a khel tawh a, season khatah euro maktaduai 6.5 a la lut. Kum 2013 khan Zucchi company-ah fing takin a sum a pei pun, euro maktaduai 19.5 zet hlawkna a chang. Amah sponsor-tu Pepsi, Puma leh Fiat aṭangin pawisa a la lut bawk.
14. Steven Gerrard - England captain hlui hian Liverpool tana a kum tawpah hian a hlawh aṭangin kum khatah euro maktaduai 9 a la lut ang a, season thara Los Angeles Galaxy a zawm chhan pakhat chu hlawh ṭha­hnem tak an pek theih vang a ni. Tunah hian Adidas, Lucozade leh Jaguar hnuaiah contract a nei mek a, a company 'Steven Gerrard' hlut zawng chu euro maktaduai 5.4 niin Merseyside-a thil neih hlut zawngin euro maktaduai 6 a chuang hret bawk.
15. Yaya Toure - Ivory Coast midfielder hian Manchester City a zawm hmain kum thum chhung Barcelona tan a khel a, kum 2010 khan Premier League player hlawh tam ber niin kum khatah euro maktaduai 13.5 a hlawh. Kum 2013 khan PSG aṭanga sawmna a dawn avangin a hlawh hi pun a ni leh bawk. African player of the year ṭum li zet ni tawh Toure hi Puma leh Nissan tan ambassador a ni.
16. Franck Ribery - French winger hian kum 2013 khan Bayern Munich-ah contract thar a ziak a, kum khatah euro maktaduai 14 a la lut. Hei bakah hian bonus aṭangin euro makta­duai khat a dawn theih dan a nei a, Nike aṭangin a bonus dawn theih zat ang hi kum tinin a la lut bawk.
17. Francesco Totti - Italian forward hi kum 23 chhung Roma player pawi­mawh a ni tawh a, kum khatah euro maktaduai 5 a hlawh a, hetah hian bonus a tel lo. Roma captain hi Nike, Pepsi leh Party Poker tan ambassador a ni a, sumdawnna lamah a hlawhtling viau bawk.
18. Gerard Pique - Spain defender hian club leh ram tan field chhungah a hlawhtling duhawm tak a lo nei tawh a. Amah hi Mango clothes tan model a ni a, EA Sports FIFA 2012 -ah khan Spain edition bikah cover-ah hman a ni a, Catalan sa (meat) company 'Bas Alimentaria' neitu zinga mi a ni bawk. Barcelona defender hi zaithiam lar Shakira nen an innei tawh a, a nupui hausakna tel miah lo pawhin a sum lak luh hi a ṭhahnem hle.
19. Sergio Aguero - Argentine forward hian nikum khan contract thar a ziak a, bonus tel awm hma hauhin kum khatah kum khatah eruo maktaduai 12.5 a la lut tawh. Amah sponsor-tu Puma, Pepsi, Gillette, Hugo Boss, leh PlayStation aṭangin kum tinin euro maktaduai 7 a la lut bawk.
20. John Terry - Chelsea captain hian kum 2000 aṭang khan London club-ah khelhna hmun nghet a chang ṭan a, tuna a contract neih mekah hian kum khatah euro maktaduai 8 a hlawh. Terry hian tun hmain Umbro nen inbiak­remna an nei a, tunah chuan Nike nen thuthlung an ziak tawh thung. English defender pawisa lakluh tam zawk erawh field pawn aṭangin a ni a, nikum khan bedroom pakaw awmna in ropui chu Surrey to the Sultan, Oman hnenah euro maktaduai 21-in a hralh a, euro maktaduai 13.5 zet hlawkna a chang.