Khatla dang zo an awm lo

Ningani zan Samsung 3:16 Plan Solution Mizoram Super League-ah Khatla TBL-in an khingpui Zarkawt Serpents 66-54 in an hneh a, MSL match thumah an la chak vek.

Khatla tan Mission Veng Vikings an hneh ṭuma che ṭha Vanlal­muana bawk a langsar a, Dawrpui Vengthar rawlthar Muana hian points 19 a score bakah rebounds vawi sarih zet a la bawk.

Hawla Indoor Sta­dium-a inkhelah TBL leh Serpents te inkhel tir lamah an hneh tawk a, halftime-ah 33-29 niin Khatla an chungnung hret. TBL tan Muana'n bul a ṭan a, quarter hmasa berah point kua a khung a; Zarkawt player-te erawh an khel ṭha rual hle.

Third Quarter-ah Khatla captain Van­lalnunsanga a che ṭha a, fourth quarter-ah Nelson Lalrohlua'n point 10 zet khungin inkhel a tawp meuh chuan TBL hi 66-54 in an chak.

Serpents manager Dino Laldinpuia Chhangte chuan, "Vawi thum kan chak lo tawh a, vanduai intih reng chi niin a lang tawh lo. Chutihrualin TBL nen khan first half kan khel ṭha a, second half lamah kan hlauh ang ngeiin an game-ah kan lut a, kan chhuak leh thei ta lo a ni," a ti.

Dino chuan sawi chhunzawmin, "Match hmabak a la tam a, insiamṭhatna hun kan la ngahin ka hria. A bul ṭhut aṭanga kan zir ṭhat leh a ngaiin kan hria, uluk zawkin kan practice ang a result ṭha zawk kan neih hi kan ring tlat a ni," tiin chak result an la neih ngei a beisei thu a sawi.

TBL coach/player H. Laldinsanga chuan, "Vawi thum chak tawh mah ila kan duhthusam ang chuan kan la khel chhuak lo. Defensive-ah chuan kan khel ṭha viau a, amaherawhchu offensive-ah hian insiamṭhatna tur kan la ngah hle. MSL boruak hi kan la zo lo deuh niin ka hria," tiin team chungchang a sawi.

Mapuia chuan sawi chhunzawmin, "Khatla vengchhung mipui aṭangin ṭawiawmna kan hmu ṭha a, anni zara hetiang din­hmun thleng thei hi kan ni. Tin, SYS Dept lamin coaching pe thei turin phal takin min chhuah a, an chungah ka lawm takzet bawk," tiin mipui pawimawhna a sawi lang.