Juventus ngam loh Fiorentina
Ningani zan khan Coppa Italia semifinal first leg-ah Juventus-in an mikhual Fiorentina chu 2-1 in an hneh lo. Second leg hi April 7 khian Fiorentina khelmual Stadio Artemio Franchi-ah an khel leh ang a, a chak zawkin final-ah Lazio leh Napoli inkhela chak zawk an hmachhawn ang.
Juventus hian an khelmual Juventus Stadium hi an hmang thiam em em a, an home game hnuhnung 47-ah an tlawm tawh lo, game 38 chakin game li chauh draw an nei. An home-a an hneh loh hnuhnung ber chu Bayern Munich niin April 2013 daih tawh kha a ni a, an record duhawm tak hi Mohamed Salah chuan a thai chhiat sak ta a ni.
Inkhel chu
Fiorentina midfielder Milan Badelj leh Juve star midfielder Paul Pogba te'n midfield-ah an hmunawm a, goal hmahruai khungtu erawh mikhual team an ni. Minute 11-na lekah Salah-a'n Fiorentina hmahruaina goal a khung nghal.
Minute 24-naaah Spainish striker Fernando Llorente chuan Pepe cross ṭha tak chu tauh goalin an siphurh a sut ve nghal a, chawlh lawk hmain goal dang a lut tawh lo.
Second half-ah pawh team pahnih an inbei tawk leh hle. Minute 56-naah goal hmahruai khungtu Salah bawk a inlar a, Juventus defender Claudio Marchisio chetsual nangchingin Salah-a'n goal ṭha tak a khung leh a, a team-te chu a vawi hnih nan hma a hruai pui.
Goal an phurh hnuah Pogba leh Llorente te'n goal khungna hun remchang hmu mah se an hun ṭha an chhawr ṭangkai zo lo, inkhel tawp thlengin goal a lut tawh lo a, mikhual Fiorentina-in 2-1 in Juventus an hneh. Fiorentina chakna hi Chelsea aṭanga loan hmanga an lak luh Salah a ni.
Boss thukhawchang
Fiorentina boss Vincenzo Montella chuan, "Zaninah khan team puitling kan ni tawh tih kan lantir a ni. Kan khingpuite kha team ṭha leh khauh tak an ni a, mahse keini pawh ka nep bik lo mai nilovin zaninah kha chuan kan ṭha zawk a ni. Goal khungtu Salah khan a khel ṭha tak zet a, tunhnaia a khelhdan hian minti hlim tak zet a ni," tiin a sawi.
Juve boss Massimiliano Allegri chuan, "Fiorentina khan chak zawk nih an phu a ni. Second half ṭan tirh khan kan tal buai deuh a, anni lam an khel ṭha sia kan tho chhuak zo ta lo a ni. Inkhel ala tawp loh avangin beidawn a la thiang lo," tiin a sawi.