Kan hnual lo - Wilson

Ireland wicketkeeper Gary Wilson chuan ICC World Cup-a South Africa an hneh loh vang ringawta an hnual loh thu a sawi.

Kum 29-a upa Wilson chuan, "World Cup hma aṭang tawh khan Australia emaw South Africa emaw hi kumin World Cup champion tura ka lo rin sa a ni. South Africa hi en ila, khawvela batsman ṭha ber ber Hashim Amla leh Faf du Plessis te an kawl a, khawvela spinner ṭha ber tih ngam Imran Tahir an kawl bawk. Khatiang ang team ṭha lutuk hneh lotu nih kha a zahthlak a lo a, hnual phah nachhan tur pawh awmin ka hre lo," tiin run 201 laia an hneh loh South Africa chungchang a sawi.

Wilson chuan vawiin a Zimbabwe an tum tur thlirlawkin, "Kan tan chuan he game hi a pawimawh em em a, World Cup-a kan game pawimawh ber a ni hial ang," a ti.

Ireland hi Group B-ah awmin an match hmasa pahnihah West Indies leh Scotland an hneh a, Zimbabwe hi an hneh chuan super-eight lut turin an dinhmun ṭha takah a ding ang. Ireland leh Zimbabwe hi Inrinni zing dar 9:00-ah an inkhel ang.