Intlansiak hi nuam ka ti - Hamilton

F1 2014 champion Lewis Hamilton chuan car intlansiak chu nuam a tih thu leh a bik takin midang tlan lehpelh vel chu nuam a tih zual thu a sawi.

Kum 30-a upa British driver chuan season thar lo awm tur thlirin a cham­pion nomawi chu humhim ngei a tum ruh hle a ni. Mercedes hian season hmasa kha an hmang ṭha hle a, World champion Hamilton hi intlansaik vawi 11-ah a tlan chak ber a, a teammate Nico Rosberg chu vawi nga tlan chak ber a ni.

March 15-a tlan ṭan tur F1 hi Mel­bourne-ah an tlan hmasa ber dawn a, intlansiak tur chu thlir lawkin Hamiltion chuan, "Intlansiak hi nuam ka ti a, ka taksa leh rilru a dam ver vawr bawk a ka nghakhlel tawh takzet a ni. Season hmasa kha kan tlan ṭha em em a, mahse kha aia ṭha zawk khan kan la tlan thei ang tih ka ring," tiin beiseina sang tak a neih thu a sawi.

Mercedes driver hi kum 2008 leh 2014 khan World Champion a lo ni tawh a, intlansiak a hmachhawn tawh zawng zawngah ṭum 33 zet pakhatna a ni tawh a, podium-ah vawi 70 zet ding tawhin point 1,486 lai a hmun tawh.

Hamilton chuan, "Tunah hian kum sarih chhung ka intlansiak tawh a, kum sarih dang chu ka la intlansiak theih ka ring. Season lo awm turah hian nikum aia ṭha zawka tlan ka tum dawn a ni," tiin a sawi.