Podolski a kir leh ang - Ali

Lukas Podolski agent Ali Pektas chuan German international chu a club pangngai Arsenal-ah bawk a kir leh a beisei thu a sawi.

Kum 29-a upa Podol­ski hian Arsenal aṭangin January thla khan Serie A club Inter Milan a zawm a, a club thar tan hian a khel ṭha tawk lo a, tun thlengin goal a la khung lo a ni. Hetiang a nih avang hian media lam chuan Inter-a a loan a zawh hunah Arsenal lama kir tawh loin Turkey lama kal tur angin an lo sawi ve mek bawk.

Hetiang thuthang leng vel karah hian Ali chuan, "Thil engkim ala thleng thei, nipui lo thleng turah hian Galatasaray lama kal tur anga sawi a awm a, thu chiang engmah ala awm lo. Inbiakna kan la nei mumal lo bawk. Podolski hmalam hun hi sawi thiam a har rih hle. A club pangngai Arsenal lamah hian kir leh a duh ka ring zawk a, chu chu ka beisei bawk a ni," tiin a sawi.