Blackburn mikhual tur Liverpool

Pathianni zan FA Cup quarter final-ah Liverpool leh Blackburn Rovers te Anfield-ah an inkhel dawn, a chak zawkin Wembley Stadium an pan ang. Season thara MLS club Los Angeles Galaxy pan mai tur Reds captain Steven Gerrard-a tan hun pawimawh a ni.

Liverpool hian season chawhma lamah beisei phak lo mah se, kum 2015-ah Premier League club zingah point an hmu hnem ber. Champion club Blackburn Rovers nena an khelh tur erawh knockout tournament FA Cup a ni.

Liverpool hian league game 12 chhung hneh loh an tawng tawh lo. Cup competition-ah erawh ṭum hnih an tla tawh; League Cup-ah Chelsea an hneh lo a, Europa League-ah Besiktas an hneh lo bawk.

Blackburn Rovers hi Premier League-ah an champion tawh a, Liverpool erawh an la champion ve lo. Blackburn hi kum 2012 khan Premier League aṭangin Championship division-ah an tla thla a, tunah hian Championship-ah 10-na an ni mek.

Liverpool hi tunhnai competitive match vawi nga an khelah vawi li an chak a, vawi khat an chak lo. Blackburn erawh tun hnaia an game vawi ngaah vawi khat chiah chak hmel an hmu a, vawi thum an khingpuite inhnehtawk puiin vawi khat an tlawm thung.

Liverpool tan rawlthar duhawm Raheem Sterling leh Phillipe Coutinho te an che ṭha ṭhin a, Daniel Sturridge-a'n ngai a awh chho leh ṭan tawh bawk. Blackburn defender tan anni pathum ringawt pawh hi mut ti tui lo tham tur an ni.

Inhliam vanga game engemawzat khel tawh lo captain Steven Gerrard hliam a dam leh ṭan tawh a, a khelh dawn leh dawn loh a la chiang lo. A awm loh chhungin a aia captain Jordan Henderson a khel ṭha thei hle.

Thawnthu hlui

Liverpool leh Blackburn Rovers hi competition hrang hrangah vawi 135 an lo inhmachhawn tawh a, Liverpool-in vawi 58 hnehna an chang a, Blackburn hi vawi 36 an chak a, a bak match 41-ah an inhnehtawk.

An inkhelh hnuhnung vawi ngaah Liverpool-in hnehna vawi thum an chang a, Blackburn vawi khat an chak a, vawikhat an inhnehtawk thung. An inkhelh hnuhnun ber ṭum chu Premier League aṭanga Blackburn an relegate ṭum kum 2012 daih tawh kha a ni a, Liverpool-in 3-2 in hnehna an chang.

Liverpool manager Brendan Rodgers chuan, "Mi zawng zawngin chak turin min beisei a, mahse Blackburn hi awlsam taka hneh chi an ni lo. An inthunun ṭha a, an manager Gary Bowyer hian Blackburn-ah hna ropui tak thawkin a team hi a enkawl ṭha em em a ni. Hneh tur chuan kan theihtawp kan chhuah a ngai dawn a ni," a ti

FA Cup Quarterfinal
INRINNI : 6:15 PM - Bradford Vs Reading;
11:00 PM - Aston Villa Vs West Brom; PATHIANNI : 8:30 - Liverpool Vs Blackburn; THAWHTANNI ZAN : 1:15 PM -
Man Utd Vs Arsenal