Vawiinah 2014 Santosh Final Rematch
Mizoramin Santosh Trophy champion turin final-ah Railways 3-0 in an sawp a, vawiin tlai dar 3:00 hian Guru Gobind Singh Stadium-ah an inhmachhawn leh dawn. Mizoram hian Delhi leh Kerala hnehin Group B hmahruaitu an ni a, Railways hian Delhi an draw hnuah Goa lakah an tlawm thung.
Mizoram team-ah final-a goal khungtu Zico Zoremsanga leh F. Lalrinpuia te an tel a, Republic Veng tlangval Valpuia hian Delhi leh Kerala an hneh ṭumin goal a khung ve ve. Mizoram tlar hma an chhuanawm rualin tlar hnung ṭhatna hmuh hmaih a thiang lo, Mizoram hian goal an la chhuah lo. Chanmari keeper Lalawmpuia a che ṭha a, tlar hnunga intlar Lalrinchhana, Ronald Zothanzama, Lalruatthara leh Lalrinzuala Khiangte te point ruk hmuhna kawngah an pawimawh hle.
Mizoram player-te bakah hian Jalandhar leh Chandigarh-a Mizo awmte an fakawm, anni hian Mizo player-te an ṭawiawm ṭha a, Mizoram team phurna leh inrintawkna petu an ni.
Mizoram coach H. Vanlalthlanga chuan, "Railways kan hmachhawn hunah tlar hma lamah player pahnih kan ti danglam ang. Practice-naa che ṭha kan duh sak dawn a, la lut miah lo player chance pek kan tum ang," tiin an khelh dan tur a sawi.
Mizoram boss chuan sawi chhunzawmin, "Railways hi team ṭha tak an ni. Santosh Trophy final round chinah chuan team vannei zawk an chak ṭhin a, chuvangin kan chak chiang ka ti ngam lo," tiin a sawi.
Mizoram hian vawiina point an hlawhchhuah chuan semifinal an lut chiang dawn. Vawiin inkhel dangah West Bengal leh Punjab an inkhel dawn a, Group A hmahruaitu zawnna inkhel a ni ang.