Valbuanga telna Muanna Veng an champion

CYMA leh MVA buatsaih LBS Suzuki 23rd Inter Branch YMA Volleyball Tournament 2024-ah Muanna Veng an champion a, nomawi an chawi theih nan best spiker-a thlan Vanlalṭanchhana (Valbuanga) a langsar hle.

Mipa Volleyball final hi August 17, Inrinni zan khan R. Dengṭhuama Hall, Mualpuiah khelh a ni a, mipui ṭhahnem tak karah Muanna Vengin champion lai Hunthar Veng chu straight set-in (25-19, 29-27, 25-21) an hneh. Muanna Vengin a vawi hnih nan nomawi an chawi a, Huntharin record thar an siam thei ta lo.

Thawm a ṭha

Final-ah entu an ṭha a, announcer-in player inhmelhriattirna a neih aṭangin thawm a ṭha nghal a, Valbuanga hming a lam rik laiin thawm a ṭha lehzual. Inkhel an ṭan chiah a, Valbuanga'n a theihna lantir nghalin a hlap dik nghal.

Muanna Vengin Valbuanga an ring a, best setter-a thlan Lalliankima'n ball zawng zawng chu Valbuanga a pe ta emaw tih mai tur a ni. Chutihrualin champion lai Huntharin tha an thlah bik lo a, 14-13 ten hma hruai bawk mah se kil tin aṭanga hlap thei Valbuanga an dang zo lo. 25-19 in Muanna Vengin set an la a, Valbuanga'n a tawp a khar ṭha.

Hunthar an chesual

Hunthar coach Lalthanzuala'n final-ah Remsangzuala (Lalmama) chu setter-ah a hmang a, captain Lalmama'n a hna tlin thaw khat hle. Set hnihnaah Lalruatfela Sailo leh Laldampuia ten an rawn thlawp ṭhat bawk avangin 10-5 in hma an hruai hman.

Mahse, light thim vangin minute hnih bawr vel an chawl a, Muanna Vengin chawlh hi an hmang ṭha - a rawn let leh chuan 11-11 a ni chho lehnghal. Valbuanga a che fuh reng bik lo a, service out zawhah coach Lalhmangaihsanga Sailo-in hahdamna hun a pe a, 15-16 in Huntharin hma an hruai mek.

Valbuanga awm loh laiin captain Sadraka Fanai leh Lalsaitluanga ten mawhphurhna an la a, inrintawkna an neih phah bawk. 19-19 a nih hnuah Valbuanga rawn let a, mahse Hunthar tan Ruatfela Sailo leh Dampuia ten an vaw ṭha a, 24-23 a ni hman.

Mahse, Huntharin an hun ṭha an bawhpelh a, hun pawimawh tak Valbuanga a rawn chet ṭhat leh avangin Muanna Veng bawkin set hnihna chu 29-27 in an la.

Straight set

Set thumnaah pawh Hunthar Veng bawkin bul an ṭan ṭha a, 6-2 te ni hman mah se Valbuanga leh Saia te hmangin Muanna Vengin an pawt thla leh a, 13-13 a nih hnuah an hawi kir tawh lo.

Muanna Vengin 16-13 a hma an hruai laiin Huntharin 'time out' an ko a, Muanna Veng ṭantuten champion inring tawh tih hriat takin 'Kan hneh ang hnehtu Pathian vangin' tiin an zai rual.

Muanna Veng an hawi kir tawh lo a, 25-21 in hnehna an chang a, champion point hi team zinga player upa ber leh captain ni bawk Sadraka Fanai hlap dik a ni.

Mipui an che ṭha

Muanna Veng coach Lalhmangaihsanga Sailo chuan, "TNT lamah crusade a awm avangin TNT lamin min rawn ṭawiawm ṭha lo a, chuti chung chuan entu kan nei ṭha hle. Muanna Veng mipui zawng zawng an rawn kal a ni hial ang," tiin mipui ṭawiawmna ṭha an hmuh avangin a lawm thu a sawi.

Inkhel chungchang sawi chhunzawmin, "Ka naute an khel ṭha a, Valbuanga pawh a che ṭha. Chutihrualin a ṭang ulh deuhin ka hria, set hnihnaah khan hahdamna hun ka pe. Kan champion hi team thawhrah a ni," tiin a sawi a, Valbuanga pawhin coach-in hahdamna hun a pe chu thutlukna ṭha tak a nih thu Vanglaini a hrilh bawk.

Inkhel entu zingah Hunthar ṭantu tam zawkin lang mah se dinhmun ṭha an din meuh loh avangin an thawm an nei ṭha tawk lo. Inkhelh banah Hunthar coach Lalthanzuala chuan, "Champion kan duh a, chumi tur chuan kan thawkrim. Mahse, Valpuia inhliamin ngai a awh lo a. Muanna Veng lam attack leh defence a ṭha si a, champion an phu zawk," tiin Vanglaini a hrilh.

-----------

"Branch 101 aṭanga ṭhalai hrisel leh fit tak mi 1212 zet mai intihsiaknaah an rawn che chhuak thei hi a lawmawm tak zet. Ruihhloin kan ṭhalai tam tak a eichhiat mek laia, a tihbuai loh ṭhalai rual ṭhahnem tak midangte nena intihsiakna ṭha nei tura mahni Branch tana an rawn pen chhuak hi a lawmawm em em a ni.

Infiammite zuk leh hmuam leh ruihtheihthil laka an inthirfihlim a, taksa hrisel leh fit ṭha tak an neih theih nana taksa sawizawi ṭhin an nihna pawh hi infiammi nih hlawkna a ni. Champion team Bungkawn Branch (Hmeichhia) leh Muanna Veng Branch (Mipa) te kan lawmpui takzet a ni."

- Darremsanga, CYMA Volleyball Org Secy