Vawi riat champion thei Bungkawn

CYMA Volleyball hmeichhe inelnaah Bungkawnin record thar an siam a, vawi riat nan an champion. Bungkawn hian August 16, Zirtawpni zana final khelhah Vaivakawn chu 25-17, 25-23, 25-2 in an hneh a, harsatna an tawk lo.

Hmeichhe volleyball inelnaah Kanan an ropui ṭhin a, kum 2016 khan a vawi sarih nan an champion. Kanan record hi sang falin lang mah se tun hnai kum 12 chhungin Bungkawnin inelna an thunun hle.

Bungkawn hian nomawi an humhim a ni ringawt lo a, inelna hnuhnung parukah vawi nga an champion. Final-ah Bungkawn hian practice match-a an hneh fo tawh Vaivakawn an hmachhawn a, inkhel thunun chungin hnehna an chang.

Captain leh best setter-a thlan Melody Lallawmkimi'n (Meme-i) a hna a tlin a, best spiker F. Lalparmawii bakah FP Lalduhkimi te hlap chu Vaivakawnin an chelh lo. Set thumnaah phei chuan Vaivakawnin point hnih chiah an hmu a, an phu ang ngeiin Bungkawn an champion.