Man City lalna paihthla thei tur Arsenal

Premier League season hnuhnung pahnihah an champion theuh thei hle a, pahnihnaah an tawp leh mai ṭhin - tun season chu a tir aṭangin thapui an thawh dawn tih a chiang, an match hmasa berah Mikel Arteta a awm mai mai thei lo.

Kai Havertz leh Bukayo Saka te goal hmangin Gunners hian an mikhual Wolverhampton Wanderers chu 2-0 in an hneh a, point thum nen season bul an ṭan a, champion lai Manchester City lalna paihthla thei tur an ni tih an lantir nghal.

Team pangngai

Inrinni zan Emirates Stadium-a inkhelah Arteta-a'n a player hman thiamsa ho hmangin bul a ṭan, season thar inbuatsaih laia khel ṭha Gabriel Jesus chu bench lamah dah niin, nikum ang bawkin a hma laiah Havertz a ring zawk.

Gunners manager hian a tisual lo - German forward Havertz hian chawlhlawk hmain Saka-a ball pek chu an tauh lut. England international hian a hlauhawm laiah tak ball a dah lut a, a changtu Havertz a che tawih ve bawk a ni.

Wolves tana inlan vawi khatna Jorgen Strand Larsen a che fuh theuh hle, mahse a ball tauh ṭha tak chu Arsenal goalkeeper David Raya chuan a lo dansak a, si phurh a sut lohna chu tlemte chauh a ni hial.

Goal khat chauh an la chhuah laiin substitute Matheus Cunha chuan hun remchang ṭha lutuk a nei bawk, mahse an chhawr thei tlat lo, goal an khung thei lo kha coach Gary O'Neil tan a luhai thlak ang.

Hun tawp dawn lamah laipui a puak nawn leh ta zawk - mual lai aṭangin Havertz chuan Saka tan ball a pe a, English forward hian box chhungah rang zeta insiamrem puiin goal lamah a pet nghal, keeper Jose Sa tan dan hman a ni lo.

Havertz leh 25

Nipui bazar hmasa khan Chelsea aṭangin Havertz hian Arsenal a zawm - North London club tana a goal hmasa ber khung turin November 25 thleng a nghah a ngai, kuminah erawh match hmasa bera minute 25-naah a khung.

Striker mamawh hlea an inngaih lai pawhin Arteta-a'n Havertz chungah rinna a nghat tlat a, season hmasa chawhnu lam aṭang khan tlarhma laiah a ring a, tun season pawh a dinhmun ngai a luah chhunzawm dawn.

Havertz leh Saka te hian hmun pawimawh bik an chang dawn a, coach Arteta-a'n champion pui a tumte an ni. Premier League champion ni tur khawpin an ṭha tawk em tih chu hunin a hril chho mai dawn a ni.

Arteta chuan, "Bukayo khan beisei phak baka ṭhain kan goal hnihna a khung. Player ṭha bikte chet dan a ni," a ti a, a player duhlai chet dan chu Lionel Messi chet dan ang maia ṭha leh mawi nia a hriat thu a sawi bawk.

Havertz pawhin a goal khungtur siamsaktu Saka a dahsan thu sawiin, "Kum 22 mi chauh a la ni a, ani ang player hi chu khawvelah an tam lo. Chutihrualin hmasawnna tur tam tak la nei, a theihna a la ti pung zel ang," tiin a sawi.