Zirkzee-a'n goal a khung nghal

Manchester United-in Community Shield-ah an player thar Joshua Zirkzee an luhtir a, £36m man forward hi Premier League ṭan zanah bench aṭanga luhtir ni in goal awmchhun a khung. Erik Ten Hag-a hoten Old Trafford-ah Fulham 1-0 in an hneh.

Man United tan Cottagers hneh hi inchhuanna tur ni hauh lo mah se season liam ta khan Old Trafford-ah an hneh loh avangin tun ṭuma point thum an hlawh chhuak hi result ṭha a ni.

Striker nei lo

Man United striker Rasmus Hojlund a inhliam a, Danish striker thlawp tura lakluh Zirkzee-a'n training a zawm tlai avangin bul ṭan turin a la inpeih lo.

Captain Bruno Fernandes chu hma tawngah dah a ni a, a hnungah Mason Mount a awm. Ten Hag-a'n striker nei loin bul an ṭan a, chutihrualin Premier League bul anṭan dan hi FA Cup final-a Manchester City an hneh ṭuma an inrem dan nen a kalhmang a inang.

Man United khel chhe lo mah se goal khung tur an nei lo a, Fernandes ke a hmui lo. Portuguese midfielder hian goalkeeper Bernd Leno chauh a hmachhawn hnuah ṭum hnih a khung lo.

ESR telna

Fulham lam hi Emile Smith Rowe telna a ni a, Arsenal aṭanga Cottagers zawmtu ESR hi a langsar tawk lo mah se mikhual team hian Andre Onana tan hna an siam ve tho.

First half-ah Kenny Tete ball pet chu Onana-a'n a dansak a, second half-ah pawh striker Rodrigo Muniz overhead kick chu United keeper hian a dang leh bawk. Point hloh thei dinhmunah United an ding.

Hei le, Zirkzee

Ten Hag-a'n chak a duh a, darkar khat a liam hnuah Alejandro Garnacho leh player thar Zirzkee te a luhtir a, goal hmuh tur a awm mai chuang lo.

Mahse, minute 87-naah Garnacho cross chu Zirzkee-a'n a khawih zeuh a, goal-ah a lut. Dutch forward goal tawih tak hi Leno-a'n a dang thei lo.

Man United hian inkhel ṭantirh aṭangin pressure an pe a, hun tawpah an pressure pek ṭhat leh defender chetsual zarah chance ṭha bik an nei. Marcus Rashford chuan mahni hma sial lo takin Garnacho a pe a, Argentine winger hian goal ruak a khung lo a, 1-0 in inkhel a tawp.

Lawmna tur

Ten Hag-a hote chak ṭawk mah se lawmna tur a awm. Season liam ta khan league-ah goal 58 zet an chhuah a, tun season-ah erawh goal chhuah loin bul an ṭan.

Goalkeeper Onana a inringtawk tawh a, defender Noussair Mazraoui a rintlak nghal viau a, Matthijs de Ligt pawh bench aṭanga lutin a hna a thawk ṭha bawk.

Chutihrualin United defender-a pawimawh ber chu Lisandro Martínez a ni a, an tlarhnung a khawng ṭhat nan Argentine defender dam ṭhat hi a pawimawh. Inhliam vanga khel thei lo defender thar Leny Yoro awm loh a la lang rih lo.

Tlarhma lam erawh a la hriam tawk lo a, season liam taa Borussia Dortmund UCL final thlenpuitu Jadon Sancho erawhin bench pawh a chang pha lo. Man United hian August 24, Inrinni hian Everton 3-0 a hnehtu Brighton an lenchilh ang.