Slot-a Liverpool an chak phawt

Jurgen Klopp-a'n kum kua ngawt Liverpool a enkawl a, a hmaa nomawi chawi theih inchhawp zawng zawng chu a chawi vek bawk - a thiamna piah lamah coach ngainatawm tak a nih tel avangin fan-ten an ngaina a, Liverpool chhuahsan turin an mitthla ngai lo.

Mahse, Klopp-a'n, "Thathona ka nei tawh lo a ni," a ti thlawt a, hah a intih em avangin Liverpool a chhuahsan - German coach ropui hmun ruak luah hi a awl lo ang tih chu thil chiang sa a ni a, chu hmun ruak zau tak chu hnawh khat turin Arne Slot an la lut.

Pre-season duhawm tak an hman hnuah Slot hoin Liverpool an inlan ta ngei a, Klopp-a thlak zawh dawn leh dawn loh sawi nan la hma mah se, an match hmasa berah erawh an chak nghal. Reds hian Inrinni zan khan kai thar Ipswich Town chu 2-0 in an hneh.

Liverpool tan Diogo Jota leh Mohamed Salah ten khualmualah goal an khung ve ve a, Ipswich Town-in a chhanletna tur an neih loh avangin kum 22 hnua top flight league an khelh leh hmasak berah an tlawm nghal.

A tirah Ipswich

Portman Road-a inkhelah beisei angin Reds an khel nghal lo a, kai thar mah ni se, Ipswich Town an che thei hle - Ipswich tan Jacob Greaves leh Omari Hutchinson ten first half-ah chance duhawm an nei ve ve a, Alisson an paltlang thei lo.

Liverpool an vannei tiin a sawi theih a, hetihrual hian Ipswich pawh an vannei ve tho. Winger Wes Burns chuan Jota nen ball an inchuhna lamah a kutin ball vai kiang mah se, yellow card pek a ni lo a, yellow card hmu tawh sa player hi a vannei takzet.

Ipswich-in team ṭha zawk laka chance neih chhawr loh pawizia an hre zui. Second half-ah Liverpool game-in awmzia a nei sawt a, minute 60-naah Diogo Jota a inlar. Trent Alexander-Arnold-a ball pek ṭha lutuk chu Salah-a'n um lutin, Jota tan a siamsak.

Portuguese forward hian goal khung thiam bik a nihna chu pholangin, hnai set sawtah chiang zetin a khung - Ipswich fan-te thawm a reh duk a, Liverpool fan-ten chak bak an ngaihtuah tawh lo.

A tawpah Salah

Liverpool-in Klopp-a 'heavy metal football' kalsan mah se, an game a mawi a, an che vel a hmuhawm ṭhin - goal an khung hmaa movement mawi tak hnua Luis Diaz-a goal khung loh te, Alexis Mac Allister leh Jota chance hlahte chu uiawm tak a tling.

Goal an khung aṭangin minute nga a liam a, Salah bawk a inlar - Liverpool forward ṭha mi hian ama thawhchhuah chu goal-ah a chantir a, goal leh assist nen season a hawng lehnghal.

Salah hian Premier League match hmasa ber khelh niah goal kua a khungna chiah a ni a, PL season-a an match hmasa ber khelh nia heti zat goal khung thei hi an awm ngai lo. Saudi Arabia nena sawizawm fo Salah chet ṭhat hi Reds tan a pawimawh dawn tih a chiang.

Kum 32 mi ni ve tawh Salah hian season hmasa khan inelna hrang hrangah match 44 khelin goal 25 a khung a, assist vawi 14 a nei. Tun hnaiah ṭhangthar Erling Haaland-ten an hmingṭhatna hliahkhuh deuh mah se, a thiam ngaiin a la thiam reng e.

-----------

''Team ṭha tak leh talent nei ṭha tak tak ka chhawm a, mahse, first half-a an khelh dan erawh kha chu a tawk lo tih ka player-te hian an hriat a ṭul. First half-ah khan ball inchuhah a chak lo zawk kan ni zel a, kan ti ṭha tawk lo.

First half-ah khan theihtawp kan chhuah lo deuh a, long ball kha chu kan hloh zel a ni ber. Second half-ah kan insiamrem hret a, football hmuhnawm tak kan khel thei tih inhmu nghal a ni.''

- Arne Slot, Liverpool manager