Zanin aṭangin Hockey inelna

Zoliana Royte Memorial Hockey 5’s Indoor Tournament-ah Mizo player ṭha leh hriat hlawhte an tel dawn a, inbuatsaihnain a vawrtawp a thleng chho mek.

Mizorama 5's Indoor Hockey inelna hmasa ber hi zanin dar 8:00 hian LPS Arena, Falkland-ah hawn a ni dawn a, fixture tichhuakin an inkhel zui nghal ang.

Hockey-ah Mizo hmeichhiate an thleng thui a, tun ṭuma hmeichhe team 16 inel tur zingah 2016 Rio Olympics-a tel India squad zinga mi Lalruatfeli'n Hnahthial District Association tan a khel dawn a, Railways player Lalhlunmawii'n Thenzawl Hockey Association tan a khel dawn bawk a ni.

Hmeichhe hockey hmunpui Thenzawl an langsar a, Hnahthial, Lunglei, Champhai, Saitual leh Mamit aṭangin district association team an tel bakah, Durtlang aṭangin team pahnih, Thingsulthliah, Hlimen, Sihphir leh Muthiin team khat an thawh.

Mipa team 18-in trophy an inchuh dawn a, India ram football inelna sang ber Indian Super League-a khel tawh Ricky Lallawmawma leh Isaac Vanmalsawma'n Durtlang Hocket Association tan an khel dawn a, player mala ngaihven hlawh zinga mi an ni.

Hetih lai hian mipa hockey hmunpui Kawnpui khua aṭangin mipa team panga an tel a, Durtlang leh Sihphirin team hnih ve ve thawhin Hlimen, North Lungleng, Sialsuk, Bungkawn, Samlukhai, Thenzawl, Hualngo, Kolasib leh Baktawngin team khat ṭheuh an nei bawk.

Ruahman dan chuan August thla tawp lamah final tura tih niin, Mizoram hockey dinhmun pho lanna tur a ni a, LPS Vision-in live-in inkhel a pe chhuak ang.

June 24 - 29 chhung khan Thenzawlah Zoliana Royte Memorial Hockey Tournament thawh khatna neih a ni tawh a, mipa team ruk leh hmeichhia team li an tel a ni.