German Super Cup latu Leverkusen

Xabi Alonso enkawl Bayer Leverkusen chuan season an khuhhawng ṭha hle - inkhel pangngaiah Stuttgart nen 2-2 in an inhnehtawk a, penalty shootout hmanga chak zawk an zawn hnuah Leverkusen hi 4-3 a chakin German Super Cup an chawi.

Inrinni zan BayArena-a inkhelah German champin tan thil a awlsam vek bik lo. Victor Boniface hmanga an goal neih chu Enzo Millot chuan a sut a, chawlhlawk hmain Leverkusen winger Martin Terrier chu hnawhchhuah a ni.

Alonso naute hian second half zawng chu player kim loa an khelh a ngai, an kim loh hnuah Deniz Undav chuan Stuttgart hmahruaina a khung a, chak turin an dinhmun pawh a ṭha hman hle.

Mahse, Leverkusen hian season hmasa lama an ze ngai an chhuah, hun tawp thlengin an beidawng lo - hamrik hnuhnung rik hma minute hnih chauh awm tawhah Patrik Schick chuan sutin penalty an pet a ngaih phah.

Stuttgart lamin penalty an pet hmasa a, panga in an pet hman - mahse Silas leh Frans Kratzig ten an hlah laiin Leverkusen tana pet hmasa pali ten an khung vek thung a ni.

Kum 1993 hnua a vawi khat nan Bayern Munich leh Borussia Dortmund tel loin German Super Cup khelh a ni a, a mak danglam zawk hle. Hnehna changtu Leverkusen coach Alonso chuan, "Hun tawp dawna player kim lo chunga kan thil tih kha a mak hle.

"German Cup nena season bul kan ṭan thei hi ka lawm, season hmasa lama chak duha kan tuihalna ang kha kan la nei a, chawlh chhung khan thil dang ngaihtuah ve mah ila, tunah chuan kan rilru a dik leh ta," a ti.

Stuttgart hian season hmasa khan mak tak maiin hun an hmang ve bawk - nipui laiin an player ṭah leh team enkawltu an chhuak a, German football inelna sang ber aṭanga tla thei dinhmunah ding hman mah se, season a tawp meuh chuan Bundeslig-ah pahnihna an ni - Bayern Munich chungah an awm.

Bundesliga leh German Cup chu Leverkusen kuta awm a ni a, hei vang hian league lama pahnihna in Super Cup hi an khel. Stuttgart manager Sebastian Hoeness chuan, "Match kan khelh hma kha chuan eng ang nge kan nih dawn ka la hre lo.

"Team ṭha nen kan inhmachhawn ta ngei a, season thara kan khelh dan tur pawh a lang thei - nikum ang bawkin lungrual leh thatho takin kan bei ho leh dawn a ni," a ti.

German football inelna sang ber Bundesliga chu tun kar tawp aṭangin an khel ṭan leh tawh ang.