Valencia laka Barca 'hero' chu Lewy

Season hmasaah point 10 ngawta Real Madrid phak loin Barcelona an champion zo lo a, tawlhthluk nawn an tum tawh lo - Valencia lakah goal chhuah hmasa mah se, Robert Lewandowski goal hnih hmangin an chhanglet a, 2-1 in Barca an chak daih.

Mualneitu Valencia hian Hugo Duro hmangin minute 44-naah an khung hmasa a, mahse, Barca-in na taka nawr letin, a tawpa chak zawk an ni - Catalan club tan Lewy a la tar thei mawlh lo!

Nizan khan Barcelona elpui ber Real Madrid chuan khualmualah Real Mallorca an lenchilh a, he thu buatsaih a nih lai hian result kan hre hman lo. Atletico Madrid chu zaninah an inlan ve dawn chauh a, dar 1:00-ah Villarreal an lenchilh ang.

Barakhaih!

Barcelona-in coach thar Hansi Flick enkawlna hnuaiah game hmuhnawm bik phochhuah an inbeisei a, fan-te pawhin season thara an match hmasa ber hi nghakhlelin an thlir - an beisei ang ngawt erawhin a kal vek bik lo.

Inkhel boruak a nung tawk lo a, game a dul a, first half minute 40 hma lamah kha chuan chawlhlawk hman hun a nghahhlelhawm thei zawk hial. Chutah Barca fans tihnualtu a thleng a, an hmuh duh an hmu lo a ni mai lo a, goal an chhuah hmasa zawk!

First half tawp nan minute khat chiah a awm tawh tihah Hugo Duro a inlar a, Diego Lopez siamsak chu Marc-Andre ter Stegen tana dan rual lohin hnai set sawtah goal-ah a chantir a, Estadio de Mestalla-a fans 46,673-te thawm a ṭha takzet.

Kha le Lewy

Kum 35 mi a nih ve tawh avangin Robert Lewandowski chungah rinna nghah reng a harsa a, tun hma a pha tawh bik lo. Mahse, Polish striker hian goal khung châkin a la tuihal reng tih a pholang a, Barca comeback nan a thawhhlawk hle.

Valencia striker Duro a phur laklawh a, a khung ngei tur nia lang chu goal line aṭangin an lo pet chhuak hman. Lewy a ngawi reng lo - first half hun pek belh minute ruknaah si phurh sutna goal a khung a, 1-1 in chawlhlawk hman a ni.

Lewy-a'n a duhtawk mai lo - minute 49-naah Raphinha chuan penalty a hlawh chhuak a, hei hi Lewy chuan petin goal-ah a chantir a, Barcelona hnehna channa turin a tawk.

A chhehvel

Barca tan rawlthar Lamine Yamal a hmuhnawm leh pek a, kum 17 mi forward hi Valencia tan a hnawk tluan chhuak zak - goal khung lo mah se, Lewy khung tur a siamsak a, inkhel tinhmuhnawmtu tih loh rual a ni lo.

Flick-a hnuaia khel tura beisei an nih angin Barca an la khel chhuak lo a, goal an khung hnuah erawh an insiamṭha - team hmuhnawm ni zel turin theihna an nei a, Germany coach ban hmasak ber Flick-a'n Bayern Munich-a a thawnthu kha tihfuh thil a ni lo tih a pholan a ṭul.

Valencia an khel ṭha a, midfield-ah Catalan club an talbuai takzet a, hei hi remchangah lain, counter attack-ah Valencia an hlauhawm ṭhin - Flick-a tan hnathawh tur a la awm nual tih a lang.

Hmabak hautak

Flick chuan, "Kan match khelh hmasak berah kan tih tur kan ti nghal a, pen khatin kan pen nghal e. Tunah chuan match thum pawimawh takin min hmuak leh ta," a ti a, an inkhelh leh tur a thlir nghal thu a sawi.

Barcelona hian August 24, Inrinni zanah Athletic Bilbao an mikhual ang a, Rayo Vallecano (August 27) leh Real Valladolid (August 31) te an hmachhawn ang a, international break-in a zui ang.

Catalan club tan hian an player lakluh thar Dani Olmo a la inlan thei lo a, register a la ni lo. Flick erawhin, "Club a zawm tlai a, inlan turin a la in fit tawk lo a ni," tiin inkhelh hmain chhuanlam a siam.