Adesanya hmaa dingchang Dricus du Plessis

UFC 305-ah nimin khan Dricus du Plessis chuan middleweight title a kawl lai chu a humhim a, MMA khawvela fighter hmuhnawm ber pawl Israel Adesanya chu submission hmangin round linaah a hneh - UFC middleweight title a hlawhchhuah hnua fight a neih leh hmasak berah hnehna a chang nghal.

Du Plessis chuan Adesanya fak zuiin, "Ani ang legend nena octagon khata fight kan hmachhawn thei hi ka lawm a, Africa aṭanga fighter lo chhuak a nihna hmusit ang zawnga ngaih theiha thil thleng kha pawi ka ti hle - zaninah hian Africa-in hnehna a chang a ni," a ti.

Fighter pahnih hi nimina an intawn hma hian ṭawngkamin an inbei na hle a, South African fighter Dricus du Plessis hian, "African tak tak champion hmasa ber ka ni," tia a sawi vang a ni - UFC-a champion tawh, Adesanya, Kamaru Usman (Nigeria ve ve) leh Cameroon-a seilian Francis Ngannou te chu Africa lam mi ni mah se, Africa khawmualpui pemsanin hmun dangah an sei lian a ni.

Kum 30 mi Du Plessis chuan, "Adesanya hi ka zah em em a, fighter ropui tak a ni. Min ring rawh u - ani hmachhawn leh hi chu ka châk tawh lo," a ti - South African fighter hian vawi 24 professional fight a neihah vawi 22 hnehna a channa chiah a ni a, vawi hnih a tlawm tawh.

UFC middleweight champion hlui Adesanya erawh thla 11 zet a chawlh hnua a fight leh hmasak ber a ni a, ani hian a chawlh hma thla 16 chhunga vawi nga ngawt fight a neih avangin a taksa leh rilru hahdam a mamawh thu sawiin a chawl a, a lo kir lehnaah a chak lo nghal.

Kum 35 mi Adesanya hian a chawlh hma khan Sean Strickland hmachhawnin, a title a lo hloh tawh a, vawi hnih a zawnin a tlawm tihna a ni - vawi 28 fight hmachhawn tawhin, vawi 24 a chak a, vawi li a tlawm.