Serie A ṭan zanah chak an awm lo!

Inter Milan chuan sulhnu duhawm lo an siam - kum 2015 aṭanga chhutin Serie A ni chunga season thar bul ṭan zana chak zo lo hmasa ber an ni, an mikhualna ramah Genoa nen 2-2 in an inhnehtawk.

Italian football inelna sang ber hi Inrinni zan khan 2024-25 season khelh ṭan a ni a, match pali awm nghalin tumah chak zo an awm lo, champion lai Inter bakah midang pawh an inhnehtawk fai vek a ni.

Genoa tana Alessandro Vogliacco goal khung chu Inter lamin Marcus Thuram-a goal hnih hmangin an chhanglet a, hun tawp hma deuh chiahin mualneitu lam hian Junior Messias hmanga sut zoin, point khat an hlawh chhuak.

Inter Milan coach Simeone Inzaghi chuan, "Goal hnih kan khung a, chak pui thei mai tur pawh kan ni. A tawp dawna goal chhuah hi chu a pawi, a bik takin keini Inter ang chuan khatiang kha kan ti tur a ni lo," a ti.

Inkhel dangah AC Milan chuan goal hnih chhuah hmasa mah se point khat an hlawh chhuak, striker thar Alvaro Morata leh Noah Okafor ta goal hmanga sutin an mikhual Torino nen 2-2 in an inhnehtawk.

Parma pawhin season thum hnuah Serie A an khel ve leh ta a, an mikhual Fiorentina nen 1-1 a inhnehtawkin point khat ve ve an insem a ni.