Zaninah hmaih thiang lo inkhel

English football tuipuite tan men rei zan a ni. Zan dar 1:15 hian FA Cup Quarterfinal-ah Arsenal-in Old Trafford-ah Manchester United an luh chhuah dawn.

Chelsea leh Manchester City te an tlak tawh avangin Premier League table aṭanga chhutin Arsenal leh United te hi a ṭha pahnih an ni a, final ai pawha hmuhnawm tur a ni.

Team chanchin

Manchester United striker Robin van Persie-a'n a ke reka hliam a neih avangin a club hlui a hmachhawn thei dawn lo a, left back Luke Shaw dinhmun a chiang lo bawk.

Arsenal-in defender thar Gabriel Paulista bakah Jack Wilshere, Mikel Arteta, Abou Diaby leh Mathieu Debuchy te inhliam vangin an chhawr thei dawn lo a. Goalkeeper Wojciech Szczesny, Nacho Monreal leh Mathieu Flamini te dinhmun a chiang lo bawk.

Ngaihnawm

FA Cup-a United-in Arsenal an hma­chhawn hnuhnung paliah goal an chhuah miah lo. Inelna hrang hranga an inhmachhawn hnuhnung 15-ah United vawi 11 an chak a, vawi khat chiah an chak lo.

United captain Wayne Rooney-a'n Premier League player zingah Arsenal (goal 11) lamah goal a khung hnem ber a, FA Cup-a an inhmachhawn hnuhnung pathumah goal a khung vek.

Final-a an inhmachhawn ṭum hnihah Gunners an chak ve ve a, semfinal-a an inhmachhawn ṭum thumah United an chak vek. Zanina an khelh tur hi quarterfinal a ni.

Engtin zel...

Manchester tlangval Danny welbeck-a'n a club hlui a hmachhawn dawn. English forward hian inhliam vanga Olivier Giroud awm loh chhungin starting eleven a chang vek mah se a dinhmun a sawh nghet hman lo.

Arsene Wenger chuan, "Danny hi player pawimawh a ni a, tlar hmaah chuan mamawh­na apiangah a khel thei a ni, a ti. Arsenal boss hian Old Trafford-a Welbeck chhawr a tum chungchang a sawi lang lo.

United captain Rooney chuan, "FA Cup hi inelna pawimawh tak a ni a, kum 1995 khan Everton-in FA Cup nomawi an chawi lai ka hmu a, ka vannei hlein ka hria. Khatihlai khan kum kua chauha upa ka ni. Champion nomawi hi kumin hian chawi ve ngei ka duh," a ti.

Manchester-in FA Cup nomawi an chawi hnuhnun ber chu 2003/04 season daih tawh kha a ni a, Rooney hi FA Cup-ah a la champion lo.

United manager Louis van Gaal chuan, "Player 11 leh 11 boruak sang tak hnuaiah kan inhmachhawn dawn a, league-ah pathumna leh palinaa kan awm avangin final ang hialah a ngaih theih," tiin Arsenal nena an inkhelh tur chu a pawimawh thu a sawi.

1999 FA Cup semifinal-a goal ropui khungtu Ryan Giggs hi Dutch manager hnuaiah a awm mek. Newcastle an hneh ṭumin Van Gaal leh Giggs inkarah inhriatthiam lohna a awm niin media lamin an tarlang a, amaherawhchu Wales captain hlui hian thuthang dik lo niin a sawi thung.

Hei bakah hian United defender Jonny Evans chu chil chhak thubuai vangin match ruk chhung hrem a ni, FA Cup quarterfinal a khel ve thei lo. United defender chungchang sawiin Arsenal manager Arsene Wenger chuan chil chhak chungchangin FA Cup quarterfinal-ah nghawng a neih a rin loh thu sawi.

Wenger chuan United an hmachhawn tur chungchang sawiin, "Old Trafford-ah chak ngei tumin kan theihna zawng zawng kan chhuah ang. Kan inkhel tur a pawimawh a, a chhan chu a chak zawk hian champion-na chance ṭha tak a nei a ni. United pawhin an theihtawp a chhuah dawn a, inkhel hmuhnawm tak a ni ngei ang," tiin a sawi.