WC Cricket round-up
ICC World Cup 2015 a hmuhnawm tawlh tawlh a, record thar a pian mawlh mawlh laiin beisei loh result pawh a awm nual.
Pakistan-in
SA an barakhaih
Kumin World Cup-a mualpho Pakistan-in rin loh takin South Africa run 29 in an hneh.
Ṭhumvawra vannei zawk South Africa-in vawm hmasak an thlang a, over 46.6-ah Pakistan batsman-te an vawm out vek a, Pakistan-in run 222 bak an tlin lo. Awlsam takin South Africa an chak mai dawn emaw tih laiin Pakistan bowler te'n an theihna an ti lang a; Mohammad Irfan, Rahat Ali leh Shahid Afridi ten wicket thum ṭheuh lain over 33.3-ah South Africa batsman-te an vaiin an out vek a, run 202 bak an tlin ta lo a ni.
Ireland an chak
Inrinni zing inkhel dangah Ireland-in Zimbabwe chu run nga-in an hneh.
Ṭhumvawra vannei zawk Zimbabwe-in vawm hmasak an thlang. Ireland-in over 50-ah mi pariat hlohin run 331 an vawchhuak. Zimbabwe chuan an target umin over 49.3-ah run 326 an tlin a, an vaia out vekin uiawm takin an chak zo ta lo a ni.
Ireland tan Ed Joyce-a'n run 112 a vaw chhuak a, Zimbabwe tan captain Brendan Taylor chuan run 121 a vawchhuak bawk.
Black Caps an kal zel
New Zealand-in an chet ṭha chhunzawm zel a, World Cup-a match nga an khelha an vawi nga chakna turin Afghanistan chu wicket rukin an hneh.
Ṭhumvawra vannei zawk Afghan hoin bat hmasak an thlang a, over 47.7-ah run 186 vawchhuakin an vaiin an out vek. New Zealand-in over 36.1-ah awlsam takin an target hi an umpha a, run 188 siamin mi pali an hloh a ni.